有話兒:李玟無飯人妻

有話兒:李玟無飯人妻

37歲的李玟(CoCo)嫁給外籍老公Bruce,升呢做幸福人妻,結婚兩年依然是「無飯」主婦,去年聖誕才學識整愛心麵包,又會半夜起床斟茶服侍老公開視像會議,擔心老公膽固醇過高,更陪他戒食海鮮。希望跟老公白頭到老的CoCo,有套獨門夫妻相處撒手鐧,她說:「好多女人結婚想改變男人,男人就唔想女人改變,老公叫我千祈唔好變!」
撰文:余燕儀

婚後推出新專輯《盛開》的李玟,大碟主題圍繞愛,已是幸福人妻的她日前接受本報專訪時晒命說:「𠵱家叫我唱太悲哀嘅歌,唔係好真實,我個人比較開心,對生命有渴望同熱情,全碟唯一悲傷嘅歌係《能不能》,因為身邊好多朋友交往多年,時間將感情沖淡,𠵱家掙扎能唔能夠再一齊,朋友問我點解同老公仲係初戀feel?我叫佢哋諗番最初愛呢個人嘅原因,唔好放大佢啲衰嘢。」

半夜斟茶遞水

在CoCo眼中,老公卻是零瑕疵,她笑咪咪說:「He's wonderful(他十分神奇),佢嘅優點係心地善良,非常顧家,好勤力。佢嗰間係紐約公司,有時瞓到半夜兩、三點起身開會,我會盡可能陪佢,攞支礦泉水畀佢飲,唔會自己瞓先,一定要互相體貼,就算約會佢遲一粒鐘我都唔會嬲,因為我都會遲到,為工作遲到要睇開啲,老公做嘢辛苦,老婆千祈唔好畀壓力佢。」
雖然結婚只有短短兩年,但CoCo深明夫妻相處之道:「好多女人結婚想改變男人,男人就唔想女人改變,老公叫我千祈唔好變,我只係要求佢注意飲食,因為佢鍾意食海鮮,但膽固醇高,我同佢一齊戒,唔食龍蝦、蜆、蟹。我唔識煮飯,但舊年聖誕學整麵包,老公食晒呀,我好有成就感。」

李玟與老公Bruce互相尊重,難怪感情好。資料圖片

未準備做媽咪

有否信心白頭到老?她說:「我有信心,但感情好難講,睇到王菲離婚好難過,好多網民話對愛情好失望,我覺得要愛就要百分百投入,分手咪分手,至少你愛過。」雖然已經37歲,但CoCo不擔心做高齡媽媽,她笑說:「我覺得自己仲係baby,未準備做媽咪,有子女係天賜,冇都唔緊要,但生BB之後我唔會做嘢,想百分百照顧小孩。」老公跟前妻有兩個女兒,身為後母的CoCo說:「兩個女好乖好sweet,初時以為後母難做,但完全唔會,我唔係代替佢哋媽咪,我係佢哋朋友,佢哋去派對着乜嘢衫會嚟搵我。」

李玟相識滿天下,早前便招呼來港工作的碧咸。
資料圖片

逢周五隨《蘋果日報》附送嘅時尚美容雜誌《add》雖然早已派完;
拎唔到書嘅朋友,可以上番《add》嘅官網 http://add.appledaily.com 睇番足本網上版,除咗有專訪外,仲有好多時裝靚嘢睇!