體壇拾趣:火箭殺到瘋靡台妹

體壇拾趣:
火箭殺到瘋靡台妹

火箭同溜馬周四晚喺馬尼拉打完NBA季前賽,已轉飛台北,準備周日另一場季前賽,火箭「林瘋」林書豪返到祖家,去到邊都惹嚟熱情台妹球迷,火箭教練麥希仲預告佢會打番正選控衞㖭!
火箭同溜馬周四搭夜機離開馬尼拉,周五凌晨3點就到達台北桃園機場,而球迷一樣咁熱情,有200幾人接機,當中大部份都係林瘋粉絲,林瘋亦好識做簽晒名,令球迷高呼值得;現場所見,更有唔少台妹悉心打扮,着晒波衫迎接偶像,令氣氛更加升溫。

林瘋狂簽名

林瘋雖然生於美國,不過父母都係台灣人,今次喺台北比賽,佢簡直有主場之利。周四對溜馬之戰,麥希安排比華利打正選控衞,好彩林瘋打後備都好搶鏡,取得14分同5次助攻;麥希喺周五下晝嘅記者會就不斷被記者追問今場邊個正選?難怪佢笑笑口同林瘋講:「呢度係你主場,我唔應該嚟。」不過對於林瘋嘅位置,麥希就話仲未決定新一季正選誰屬,目前仲係試陣階段,不過周日就會畀林瘋打正選。

「事業」型粉絲

魔獸行名店冇斬穫

完成火箭記者會,林書豪同懷特侯活就各自各精采。戴上黑框眼鏡嘅林瘋出席贊助商晚宴,魔獸就到酒店附近嘅LV、Gucci同Prada名店閒逛,不過就冇收穫,之但係心情都好靚,沿途都有幫粉絲簽名。
另外,懷特侯活喺周四之戰上陣24分鐘,結果只貢獻9分同3籃板,表現真係好一般,可能同佢喜愛夜蒲有關。因為美國狗仔隊網站影到佢周一晚去馬尼拉當地一間著名卡拉OK夜總會包VIP房蒲,仲玩到天光;「超人」出門口時仲同粉絲握手。之但係,麥希一向治軍嚴明,會唔會嬲到震呢?

超人愛名店

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange