【中環】台灣組合S.H.E今晚喺紅館開騷，成員Selina喺上海拍爆破戲燒傷後，經過三年復健終於可以歸位，呢次係Selina傷後三女正式合體開騷。前晚7點幾，S.H.E同工作人員分坐兩架保母車，浩浩蕩蕩到中環鏞記食燒鵝，有幾位粉絲包咗一架貨van跟車，再會合其他粉絲喺樓下等偶像。
疤痕好清晰
S.H.E眾人搭𨋢上包廳開餐，食足兩粒鐘才離去。Ella同Hebe戴黑超，素顏嘅Selina見到記者表現友善，着膊頭開窿衫嘅Selina，露出了右肩膊同左手臂嘅火灼傷痕，尤其左手臂嘅傷疤長近10吋，面積好大，可想而知當時Selina被火舌焚身嘅痛苦，睇到都戥佢心酸難過！
幸好Selina喺家人同好友嘅支持下，身心都康復得好好，前晚佢臨上保母車時，仲貪玩企喺車門側邊扮助手，一邊叫工作人員：「小心啲。」一邊扶大家上車，心情靚爆鏡，佢上車後仲繼續笑到四萬咁口，露出幸福雙下巴。
採訪、攝影：徐錦池、楊浩賢、吳耀輝
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24