去年尾播嘅《大太監》口碑唔錯，今年無綫節目巡禮都由原班人馬拍攝《太監五虎》，噚日黎耀祥、胡定欣、蕭正楠、陳國邦同黃浩然去錦田取景，聽講故事由慈禧駕崩後開始，佢哋幾個走出皇宮化身馬賊、西裝大賊同國民黨黨員兼警察去奪寶，仲連場動作場面。
定欣翻生馬賊
49歲嘅祥仔寶刀未老，同黃浩然都有吊威吔鏡頭，祥仔走嚟走去，大汗叠細汗，身手靈活。有人提議祥仔食住條水拍動作戲，佢耍手話：「嘩，我驚食得唔長遠喎，食兩日就退休喇！我年紀大，今日咪當做桑拿減肥，返去實瘦兩磅。」曹永廉同蕭正楠最舒服，簡簡單單拍一場斷背戲。而唯一女將胡定欣就要騎馬上陣，佢話：「好好玩，上一集講我係死咗，唔知將來個故事會點安排。」陳國邦除褲整理威吔時，露出紅色底褲，十足利是封一樣搶眼！
另邊廂，吳啟華同徐子珊噚日喺柴灣拍劇集《再見明天》節目巡禮，劇情話佢哋因年齡差距唔敢相戀，因車禍令子珊逼啟華表白。有指今年視后係佢同鍾嘉欣之爭？子珊話言之尚早。至於啟華就話：「今年幫無綫拍劇推咗內地兩部劇，推一部唔見一間廠，損失慘重。」
版主：陳基征
足本收睇《亂噏24》x 甄子丹；天后潮媽陳慧琳接力登場！
周一至周五《亂噏24》預埋你： http://bit.ly/appletalk24