喺香港舉行嘅蘇富比2013年秋季拍賣會，前日（8日）圓滿結束，短短五日拍賣總成交額有成42億銀，創下國際拍賣行喺亞洲總成交額新高紀錄，比起之前估計嘅28.8億銀，足足多咗四成半，認真巴閉。今次一共售出3,162件拍賣品，發言人話，今年嘅新買家較舊年秋季拍賣多咗一成半，內地買家就多咗14%。
曾梵志趙無極創個人新高
今次內地嘅藝術品非常爭氣，創下20世紀中國藝術拍賣嘅最高總成交紀錄，一共拍得7.5億銀。曾梵志同另一位華裔畫家趙無極，都喺今次拍賣刷新咗個人紀錄。趙無極另一幅作品《抽象》，亦都會喺12月嘅蘇富比北京拍賣會上拍賣，估價3,500萬至4,500萬人仔。呢個拍賣會亦會係蘇富比喺舊年申請到牌照後，喺內地舉行嘅首個大型商業拍賣。
另外，今次拍賣會最矚目嘅，莫過於係成粒鵪鶉蛋咁大嘅鑽石。呢粒拍賣史上最大、有成118.28卡嘅大鑽石，喺上個禮拜六俾一個亞洲收藏家，以2.39億銀投得，兼且創埋白鑽嘅成交紀錄。
內地畫家曾梵志模仿同名名畫嘅油畫作品《最後的晚餐》，亦都以1.8億銀高價成交，破盡所有當代亞洲藝術品嘅拍賣紀錄，仲創咗在世嘅當代中國藝術家作品拍賣紀錄。究竟邊個買呢幅畫？有內地傳聞話買家係卡塔爾公主；但係蘇富比發言人澄清話，買家係嚟自歐洲嘅私人收藏家。
蘇富比2013秋季拍賣會破紀錄成交展品
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange