好多人戲言半官方公營機構係退休高官俱樂部，八方近日發現一個真正退休高官後樂園，包括李麗娟、劉吳惠蘭、俞宗怡同蔡瑩璧等「手袋黨」高官，紛紛喺中山雍泉山莊置業，連前局長馬時亨都有有幾個單位。呢個退休高官後樂園最近卻爆出是非，身為「大業主」嘅肥馬捲入財爺鬍鬚曾親友疑似買貴樓嘅風波，搞到肥馬急急呼冤。
傳馬太入貨轉手賺唔少
雍泉山莊由內地中山市凱星房地產公司發展，旁邊係由老霍開發嘅中山溫泉高爾夫球場，香港搭船搭車去都幾方便；呎價幾百蚊，一個千多呎單位幾十萬元有交易，傳聞肥馬太太「圈」咗近百單位！八方早前去中山睇樓，職員爆料，指「官場媽打」李麗娟同老友買咗30、40個單位；肥馬太太則掃咗百幾個單位，全部高層望高爾夫球場，又稱馬太將單位轉手賺唔少。政圈盛傳鬍鬚曾「親朋戚友」都有向馬太入貨，後來卻發現貴過向發展商買，搞到撻定收場云云。
八方問肥馬搞乜嘢啦，佢話自己係球會廿幾年會員，舊年打波見到個盤好靚價錢又筍，知道媽打都係業主，就扑槌買咗一個單位同媽打做鄰居，之後再同太太及幾個朋友買咗幾個望球場景單位；當時諗，如果成幢大廈都係老友買晒，好似會所咁幾過癮，於是呼朋喚友睇樓，結果廿幾個單位畀佢班朋友掃晒。
肥馬買咗頂樓單位，太太同兩個女名下就有另外四個單位，佢話聽講林鄭老公都買咗，但強調朋友都係向發展商買，佢同太太都冇做賣樓生意，更無「圈」過百單位轉售；至於馬太同財爺「親朋戚友」嘅買賣風波，肥馬話，聽聞財爺好似諗過買呢個盤，但之後又冇買。財爺辦公室說話事件同公務無關，不作評論。
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange