多名高官買入中山雍泉度假山莊做退休後樂園，八方日前曾到當地實地睇睇，現場睇樓，山莊裏面的確好豪華，環境又清靜，不過配套就認真麻麻。
雍泉山莊佔地範圍好大，有個大會所，不過會所大堂暫時被徵用做售樓部，個泳池似乎好耐冇人打理，有啲殘舊。八方行勻成個山莊，發現屋苑內冇商場冇超市，只係得一間望埋去似辦館嘅士多，貨品種類少，拍晒烏蠅，連燈都冇開。
八方睇樓要先經保安員登記，守衞都幾認真。山莊有三期，第一期係獨立屋，每間都有獨立車位同花園，相當豪華，有啲歐洲小鎮feel；第二期係多層大廈，帶八方睇樓嘅經紀話一、二期已賣得七七八八，但八方眼見大部份單位冇人住，甚至未裝修，而第三期仍在興建。
八方去咗一個面向高爾夫球場景嘅三房單位睇樓，經紀爆響口，話媽打同馬太就係掃咗樓上樓下嘅單位。單位係清水房，間格四正，唔似香港啲發水樓咁鬼死多窗台，行出大露台，望晒高爾夫球場景，八方離開堆填區嚟到中山，先知道乜嘢叫做真正心曠神怡。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24