NBA月尾開始新球季，近期受膝傷困擾嘅朗度（Rondo）趕唔趕得切復出就未知，但肯定可以喺開季前賺番一筆。事關呢位波士頓塞爾特人球星，剛同安踏（2020）簽咗約，做咗品牌代言人。雖然安踏咁把炮喺Nike手上搶到朗度，成功升呢，但呢個消息一早喺坊間流傳，所以噚日股價只係興奮過一陣，埋單只能平收。
安踏幫朗度設計咗對戰鞋RR1，仲用咗波士頓隊色綠襯白。安踏話對鞋喺支撐、保護同透氣各方面都可以滿足球員喺賽場上嘅需求，售價仲只係399人仔，講到咁犀利，唔知可唔可以幫朗度紓緩吓傷勢呢？
安踏旗下另一個NBA球星加尼特（Garnett），以前都曾經效力波士頓塞爾特人，仲同朗度一齊拎過NBA總冠軍，雖然已經蟬過別枝，但𠵱家同為安踏效力，話唔定有機會聚吓舊喎。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24