【本報訊】被爆在新界東北囤地的發展局局長陳茂波，昨在建制派群起護短下逃過被立法會出動特權法調查。民主派議員列舉多項囤地風波疑點，斥陳留任是「拖住發展後腿」，但陳茂波繼續死撐買地一事距今19年，「有心囤地就唔會只係買一次」，縱使有建制派議員要求他宣誓為解畫作實亦遭拒絕，只肯就解說「論盡」致歉。
記者：呂浩然
動用特權法徹查陳茂波的動議由公民黨郭家麒提出，他諷刺稱：「原來佢（陳）個仔係佢太太嘅家人，任何一個老實人，都唔會選擇用呢種方法去迴避問題。」泛民接連發炮聲援。
公民黨梁家傑列舉多個疑團，例如陳誇口買地為度假之用、但附近村民鮮見陳氏一家，以及持有該地的國萬實業變為不活動公司後，又曾收取地租而陳未有解釋等，指其仍有隱瞞；工黨李卓人則稱陳解畫時用盡語言偽術，若不查明真相，只會令陳日後推動新界東北計劃時遭公眾質疑。
蔣麗芸保波喪叫
建制派陣營中，曾怒插陳茂波的工業界林大輝指囤地一事不單止令陳民望下挫，更影響港府威信，暗示陳若未有好表現，應該下台：「退一步海闊天空都唔係壞嘅。」
其他建制派則謬論護短。民建聯蔣麗芸稱已有人就事件向廉署舉報，喪叫：「你要我哋70個議員查乜嘢？你想查佢老婆係咪？我哋要做嘢，唔係陪你玩查佢呀！No！I am not！」保險界陳健波更指疑點利益歸當事人，認為以特權法調查是「不做正事，只係搞事」，亦令陳承受精神壓力，「同劏開佢冇分別」。
負責答辯的政務司司長林鄭月娥直言，早有心理準備復會後某些官員會被窮追猛打，對此「只能夠感到無奈」，強調陳已按問責官員守則及行會要求申報利益，無證據顯示他違規及有不當行為，更稱政府內部是按機制進行規劃及開發土地，非局長一人便可隨意操控，更訓示議會不應浪費時間調查。
陳茂波答辯時僅為回應事件時有點「論盡」致歉，隨即反責議員即使發言可免受刑責，也不應信口雌黃，斥議員的質疑片面和武斷，無意逐一反駁，但他又以民主黨何俊仁被指漏報利益及涂謹申早年的匯標事件為擋箭牌，推說以代理人身份持有公司股份不是新鮮事，惟終未有解釋舅仔購買國萬的錢從何來。議案最後在建制派人數佔優的功能組別否決下遭否決。
議員怒轟陳茂波
公民黨梁家傑
「一個發展局局長拖住發展嘅後腿，真係好大諷刺。民調結果已經顯示市民對陳茂波嘅解釋未收貨，覺得係掩飾多過解釋。」
工黨李卓人
「破壞容易建設難，邊個破壞香港制度？係梁振英同陳茂波，無端端邊個搞劏房、邊個搞圈地？」
工業界林大輝
「今次真係左右為難，冇充份資料證明陳茂波有誠信問題同利益衝突，但陳茂波嘅解釋，又有啲前言不對後語、顧左右而言他。」
會計界梁繼昌
「法律就係法律。（隱瞞的地租收入）收幾多錢都好，唔符合《稅務條例》或者《公司條例》規定，就係犯法！」
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange