高永文局長係骨科名醫，雖然𠵱家棄醫從政咋，但依舊好猛料，一握大家隻手，就知大家使唔使休息或者唞唞。事緣好有腰骨嘅唐營悍將林大輝，早排經常用黑莓手機打字，之後左手嘅手指公出咗事，硬到彎曲唔到，但一直闊佬懶理；佢之後喺一個酒會上遇上高永文，大家梗係有禮貌咁握吓手，點知一握手，民望高就即刻斷症，話佢患上「手機手」，叫佢盡快求醫。
嘩，民望高開到口，大輝點敢唔擔憂？佢之後就去到仁安醫院求醫，醫生都叫佢試吓打類固醇，若然搞唔掂，就要幫佢隻手指公開刀，移除令佢手指彎曲唔到嘅部份。好在高神醫及時提醒，令大輝及早求醫，最終大步檻過，打完支針後即刻康復。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24