港股好似跌唔落，但有兩個趨勢戰友不可不察：一、最強勢的科網股掉頭，代表聰明錢走緊，去咗炒內房及低殘股，拎埋個尾彩；二、最強防守性的藥股破位而上，代表避險意識急升。睇番近一季，藥股悶到暈，跟大市走勢背馳。家陣藥股終於蘇醒，隨時代表個市向下。
藥股之中，魏力對石藥集團（1093）情有獨鍾，去年底獲母公司注資後，成間公司變得好sexy，增長潛力極大。阿媽向石藥引進「三大護法」，包括治療中風藥「恩必普」、紓緩老人癡呆症的「歐來寧」，以及高血壓藥「玄寧」，三者均為創新專科藥，隨着人口老化問題惡化，呢三寶絕對係石藥盈利持續爆升的三枚引擎。
去年，中國五大最暢銷藥品都係心腦血管藥，排第一的「血栓通」，一年銷售額56億人仔，超誇張！睇番恩必普，純利率40%，上半年膠囊及注射藥銷售共4.5億銀，按年大增56%，大約只是第一名的五分之一，潛力可見一斑。最近，恩必普更鋪路去美國賣，對提升銷售及知名度大有助益。
專科藥大賣，原有的維生素業務經歷多年行業整合後，亦將見底反彈，毛利率回升在望。此外，石藥亦將唔賺錢的孢菌素中間體業務賣走，下半年條數將更為靚仔。該股昨大成交破關而上，戰友可待升穿4.43元追入，目標睇5.50元。
魏力
http://www.facebook.com/2012jason
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange