同是Android機，三星上星期公佈季度業績就勝預期，但來自台灣、由TVB股東王雪紅打骰的HTC，卻首次蝕大錢。千祈唔好睇少這短短一季，只爭朝夕的手機市場裏，半季都輸唔起。根據往績，凡是主業搞手機的公司，只要一出現首次季度虧損，幾年內就多數會被淘汰，又或者賣盤收場，「死亡率」高達九成九。當年Motorola捱了5年，Nokia和BlackBerry就只撐到兩年。所以HTC如今已經身陷泥淖，難怪盛傳會被大陸公司收購。
海迪聽見不少朋友提過，其實HTC手機功能不算差，無奈大家買Android機，都只會想起三星。Apple有自己軟件配套，走高檔路線，具特殊定位，難以和其他對手相比。但如果齋睇軟件一樣的Android機，三星贏在同時亦是全球最大記憶體生產商，在生產操控、市場反應方面，有着無可匹比的優勢。這堪比「手機界的Zara」，三星的模式讓自己靈活適應市場喜惡，可在短時間以機海戰術，殺出血路。
相反，HTC連穩定供貨都有困難，如旗艦機HTC One就成日缺貨，加上在規模上先天不足，神仙難救。
海迪
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24