眼見fb為首嘅美國科網股急急腳回吐，噚日香港上市嘅科網軟件股亦震一震。但大家又唔使太驚，𠵱家科網股唔同2000年時，當時增長潛力一味靠吹，更吹到泡沫爆。
𠵱家科網界早已知點利用網絡去搵錢，當中以成功建立龐大用戶平台嘅公司，好似fb、騰訊（700）同就快上市嘅twitter就最精叻。目前要諗嘅問題係點樣去充分利用手上嘅資訊。
講到搵錢，fb同twitter亦已搵到新戰線。之前《半澤直樹》紅到發紫，於臨播結局前，fb亦被一句一句「百倍奉還」洗版，可想而知觀眾的確好鍾意將社交媒體當成劇集討論區。
兩間公司亦好醒地睇中呢一點，爭住賣收視率數據。twitter最新公佈，同AC Nielsen合作發表「twitter收視率指標」；至於facebook亦都唔輸蝕，擴大收視率分析資料俾各大電視台。
查實社交媒體嘅收視數據絕對值得參考。好似當年無記嘅《天與地》，明明於網上成為熱話，但偏偏收視率唔高。證明有部份劇集雖只吸引到小眾，但因為佢哋較投入，所以於網上曝光機會更大。不過菲菲估計，無記應該唔多希望收到呢類收視數據，因為喺fb鬧爆佢啲劇嘅人，實在太多了。
Fifi
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange