曾監製亞視劇集《再見艷陽天》嘅楊紹鴻，離開亞視喺內地拍咗唔少劇集，前年佢監製咗部內地人投資幾百萬元嘅電視電影《嚴冬裏的春天》上、下兩集，因應當時內地推行嘅關愛行動，以希望工程為背景，講香港人點樣返內地與同胞一齊幫貧困山區學童讀書嘅故事，香港演員方面有羅家英、陳秀雯、樓南光等，當時攞晒內地批文，喺北京開記招，清遠實景拍攝。
點知香港人嘅愛心又一次錯付，早前投資方收到內地廣電局通知，唔批准播映，理由係「內地冇咁窮嘅人，唔使香港人幫」，咁嘅理由，激到投資方紮紮跳，明明申請批文時寫到明題材內容，但拍完晒至話因為呢啲內容而唔播得！
楊紹鴻噚日被問到此事時話：「好遺憾！我唔知佢哋審批標準係點，知道晒拍攝題材內容先至審批，但最後就係因為呢啲嘢唔批，對佢哋嘅處理真係不願置評！」
「嘥咗大家嘅心血」
有份拍嘅陳秀雯亦都覺得可惜：「有啲嘥咗投資方嘅善意、大家嘅心血同時間，至於廣電局嘅睇法，我理解唔到佢哋嘅準則，演員向來都唔太了解好多內部嘅政策。」秀雯仲講笑話從來未試過拍咗嘅嘢出唔到街，希望唔好再有下次喎！
版主：陳基征
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24