短線要睇實隻長盈控股（689），佢幅圖自今年5月以來，營造咗個大三角形整固走勢，噚日突破阻力位，好有大茶飯feel。事實上，呢隻股應該係有啲勁嘢跟尾，因為佢喺今年7月批咗6.5億股新股，個佔比係擴大股本後嘅16.54%，大過原有大股東，呢手貨冇出過街，好明顯係轉咗入新主度，再從手頭上資料顯示，長盈好有可能已經落入澳門三大家族之一「澳門王」何賢家族手上。
百億氣油項目隨時注入
新主好可能係何賢家族或相關成員，因公司喺配股前，委任何敬豐（Eric）做主席，Eric係已故「澳門王」兼大豐銀行老闆何賢個孫。Eric過去只係出任過聯合能源（467）、大自然地板（2083）同亞博科技（8279）嘅非執董，但坐正做主席，只有長盈一隻。據《蘋果日報》今年3月3日嘅周日人物專訪中指，佢喺2007年已開始接手家族生意，所以長盈呢壇嘢應係佢幫何家嘅第一擊！
何賢家族係澳門三大家族之一，資產規模佔澳門經濟20%至30%，富可敵國，業務涵蓋賭業、金融、能源、房地產、資源、基建，以及海外龐大商業王國，估計身家數千億元，被喻為亞洲最大隱形富豪。長盈早前向Eric授出咗2.17億股嘅購股權，每股行使價0.206元，佔個股權比例唔細，呢手購股權就埋咗何家入主長盈嘅重要伏線。如果何家求其注入一項資產入長盈，嘩！可以好誇張。
事實上，由去年底嘅通告，至到今年中出嘅業績報告，長盈都反覆話傾緊收購北美一個大型油氣項目，據長盈預計，倘建議收購事項得以進行，探明儲量之基礎購買價將介乎78億至136.5億元，但長盈𠵱家10億市值都唔夠，可以話係單大槓桿收購，唔排除呢單過百億氣油注資就係何家入主長盈嘅頭炮。
仲有啲蛛絲馬跡要留意，長盈今年4月委任謝國輝（Sammy）做CEO，Sammy以前喺當年仍由大東持有嘅香港電訊做過，亦曾經係和黃（013）拓展電子商貿業務嘅領軍人物，Sammy專係幫啲大家族謀事，所以佢今次入局長盈，應該係幫何家手搞大時代。
同期，長盈又委任Allan Ritchie為執董兼副行政總裁，佢喺投資銀行業務辦理同交易架構方面擁有逾25年經驗，曾喺Westpac、ANZ Bank、匯豐及BNP Paribas擔任高級職務，更擅長複雜交易架構，專注於機構及公司客戶金額數十億元之全球交易，包括大量項目及架構融資交易。有埋佢喺度坐陣，單過百億注資肯定好快搞掂！
長盈搞咁多前期工作如批股、授出購股權（包括授畀Sammy等董事，每股行使價0.255元），肯定有大動作。再睇番Eric之前出任非執董嘅公司，股價全部都好勁，如亞博科技，年初至今，已升超過一倍，冇理由佢坐正嘅長盈咁失威囉！作為何家第一擊，又點止一倍！長缐起碼1元之上，至於短缐先睇Sammy個購股權嘅一倍即0.51元。
陳承龍
本欄逢周四刊登
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24