碧咸上季喺巴黎聖日耳門結束長達20年嘅職業球員生涯，而佢喺自己最後一個球季，仲好有市場價值；淨係贊助費就勁擸逾1,650萬鎊（約2.05億港元），吸金能力果然係強到冇朋友。
碧咸嗰間公司Footwork Productions日前公佈12年嘅營業額，結果比前一季嘅1,520萬鎊，升咗超過10%，去到成1,650萬鎊。換句話講，呢位38歲嘅英格蘭名宿喺最後一個職業球員球季，有成1,650萬鎊嘅贊助費。
其實，外界都估到佢喺12年攞到嘅贊助費會多過11年好多。有分析員喺舊年講過：「碧咸喺11年有成1,330萬鎊嘅贊助，證明佢本身就係一個好有叫座力嘅品牌。預期佢喺12年會搵更多，因為係佢作為職業運動員嘅最後一年，對佢同埋佢嘅贊助商嚟講，係好特別嘅時刻。」
由於效力過曼聯、皇家馬德里同AC米蘭等大會嘅碧咸，形象好兼且靚仔又有型，向來都係贊助商嘅寵兒；幫adidas、三星、Breitling同埋H&M等世界著名品牌做代言人。
退休後吸金力更強
Footwork Productions喺11年嘅營業額有1,520萬鎊，碧咸就出咗1,330萬鎊嘅糧，佢間公司喺12年搵多咗，佢份糧亦肯定會多咗。消息話就有成1,410萬鎊，而呢條數仲未包括佢喺洛杉磯銀河嘅250萬鎊人工；咁即係話佢總共執咗1,660萬鎊。連被公認為全球最好波嘅阿根廷、巴塞隆拿前鋒美斯，同埋葡萄牙、皇馬前鋒基斯坦奴朗拿度，場外嘅吸金能力都冇咁強。
碧咸掛咗靴後，可以全情投入拍廣告同做宣傳推廣工作，先排仲做埋中超同Sky Sports嘅大使，勁執幾百萬鎊，所以佢嘅吸金力，絕對唔會因為唔再係職業足球員而減咗，反而升咗至真。照咁睇，佢好有機會喺13年再賺多啲，話唔埋可以去到2,000萬鎊都未定。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24