「城嫂」呢個位，真係唔易做，移燈換凳，由熊黛林到苟姑娘到葉熙祺，凳都未坐暖，又話換人——除咗熊黛林之外。所以話，熊黛林，係一項奇蹟。
成日爆響口唔識收口，一時話熊黛林係前輩暗示人家年紀唔細，一時又暗示同城城係「好朋友」嘅葉熙祺，即使已有報道話城城不滿有人多嘴而斬纜，但葉熙祺仍自爆中秋節收到城城短訊，並兩度於微博表明會採取法律行動——「9月3日我的律師聲明不是白發的，明天開始我的律師函也不是白送的。21世紀我們的社會渾濁，但凡事還是講證據哦。」
最近有報道就話，葉熙祺「出城」後，到中環蘭桂坊蒲；另一邊廂，郭富城卻在上環尚興歎潮菜，二人真係「這麼近那麼遠」，曾經登門入室嘅葉熙祺卻不愁寂寞，有報道指佢吸水力強，喺北京住千萬豪宅，出入以保時捷代步，財來自有方。噚日有報道就話，葉小姐唔止吸水力強，而且抽水力都好強。最近苟姑娘因為身體不適加上壓力太大，體重一直維持「高水平」而不下，報道指苟姑娘為求快快修身，故豪擲幾萬元購入大量某品牌新推出、唔少明星密試嘅減肥藥，又打泰拳減肥，希望體重下降。
知情者話，苟姑娘自從同城城傳緋聞之後，一直好大壓力，因為佢唔想俾人覺得借緋聞做宣傳，佢想靠自己，但次次出席活動都被追問緋聞，令苟姑娘好緊張，驚講錯嘢唔知點應對，結果搞成咁。惟有拍完《飛虎》後，向公司請假一個月，好好調理一下。
一個博宣傳，另一個剛好相反，認真特別。該報道仲問番葉熙祺點睇過氣情敵苟姑娘？葉熙祺就話:「佢係咪有病呀？係就唞吓啦!」報道形容葉熙祺講嗰陣仲偷笑喎。苟姑娘就話:「我冇病!對於我嘅健康情況，我唔會再回應，我心情好似去咗馬爾代夫咁，多謝關心!」
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！