力爭3連霸嘅熱火，周一喺主場對鷹隊，揭開佢哋季前賽嘅序幕；雖然獲迪同新兵中鋒奧丹冇上場，再加上「大帝」勒邦占士成場都冇乜料到，但係主隊仲有保殊攻入21分，最後以92:87力克鷹隊，新一季算係有個好開始。
保殊今場真係着晒火，8射7中仲要6個罰球入晒，攻入全場最高21分，贏波功臣真係實至名歸。33歲新兵羅渣美臣都貢獻咗14分，但係反觀呢兩季大熟大勇嘅大帝，今場就好鬼靜；雖然交出5次助攻，但作為頭號得分手嘅佢，全場11投得4次命中，罰球線上表現仲曳，4次起手竟然得一次攞到分，成場波只有9分進賬。好彩呢場係季前賽，如果唔係球迷實狂插佢表現走樣。
獲迪傷癒自信返晒嚟
奧丹就因為太耐冇比賽，所以教練史普利斯查都係睇定啲，決定唔出佢住。至於獲迪就因為呢排操得太盡，史帥都覺得畀佢唞吓會好啲，而佢本人都覺得決定正確：「教練想我確保身體健康，呢排自己又真係練得落力，所以就算我可以落場，都覺得連續幾日都去得咁盡，休息吓都係件好事，等我對腳可以復原。」
其實獲迪好「弗」，就連大帝都話老友「弗」到好似2010年訓練營嗰時咁：「獲迪嘅爆發力、速度都返晒嚟，睇落傷患都已經好番晒。身體健康令到佢有番自信心，對球隊係好事。」熱火今場有6名球員冇上陣，史帥賽後話個個都打得：「佢哋全部都話準備好落場，不過咁多人我真係要安排好先作到決定。」
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24