內地股市復市造好，帶動港股升逾200點，重上23000關。早前熱炒嘅科網股稍為唞氣（騰訊（700）創新高例外），內房股接力炒上，閒閒哋都有半成過外升幅。值得留意嘅係，市場開始對華府暫停運作以及美國債務上限戒心減低，小心係大市調整嘅訊號。
噚日推介青蛙王子（1259），單日抽高9%，證明圖表有突破，升勢唔會咁短癮。信利國際（732）昨破8月阻力，正向今年高位邁進，由於業績交到功課，破位只係時間問題。
信利公佈，今年頭九個月收益按年大增68.7%至145.6億港紙，帶動淨利潤將大幅增長。智能手機熱潮席捲全城，集團生產嘅液晶體顯示器模組及觸控屏需求旺盛，呢一兩年發盈喜變成例行公事，但估唔到喺高基數效應下，信利依然keep到個勢。事實上，拆開每季睇，信利第一、二、三季收益分別為33.9億、52.8億及58.9億銀，按季依舊有增長，實在難能可貴。睇估值，保守估計下半年盈利較上半年多兩成，則年度化市盈率僅9倍，絕對係大平賣，噚日成交量創近年新高，相信有基金換馬追捧，其威力不可小覷，係咁易用11倍市盈率作目標，可見6.2元，潛在升幅22%，絕對係逢低吸納之選。
唐牛
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24