香港大學因為兩年前搞百年校慶臨尾香，弄出一個「八一八事件」，令到中央政府、特區政府與港大都非常尷尬，形成三輸局面，港大校務委員會（即該校之校董會）居然不用負責，將全部責任推晒落校長一人身上，卒之犧牲咗徐立之呢位大好人，令佢不能續約五年，自願掛冠而去，但又扯住唔俾佢走喎，請佢留任至新聘校長上任為止，徐立之勝在廣大出胸襟，又肯捱義氣，點知一捱就係兩年有多，算係一個紀錄。
好嘞，港大卒之選出新校長，就係英國人馬斐森教授，大概因為佢係英國人，素來批評徐立之嘅一啲港大校友立即叫好。自從樂品淳在1972年退休之後，港大在麥理浩、尤德、衛奕信總督時代，已開始聘請華人做校長，配合英國人部署退出香港及追上中國興起之大趨勢，如今港大一反四十一年嘅潮流，搵英國人做校長，無論如何解讀，都有啲令人覺得出奇。今時今日，一位完全冇亞洲經驗，不懂中國，對香港無認識之醫科教授，又唔係來自世界一流學府，點樣鎮得住港大各山頭及與內地建立科研交流關係呀？
六十年代畢業嘅港大一枝健筆，現任港大新聞傳播課程主管陳婉瑩撰文向馬斐森發炮，指佢唔夠資格、資歷出任港大校長，指「從只有五十萬人口的英國Bristol市空降一個要向港人問道的醫學教授來維護我們的自由，那是天大的笑話……選出一個對中國一無所知的校長，所謂洋人不會與政治打交道，也就不會『出事』，希圖無知無為，等於從時代的責任中退卻（retreat），這將是港大的悲劇，香港的悲劇……HKU deserves better」。陳婉瑩言詞悲切，令人為港大感嘆。如果今次港大校長遴選委員會唔係由周文耀（港大電機70）做主席嘅話，左丁山亦會完全接受陳婉瑩之言。但左丁山認識陳周兩位多年，知道兩位都係對港大忠心耿耿之人，周文耀係中環價值之最佳模範，做事專業，一絲不苟，對事不對人，堅持原則，不向權貴壓力屈服，唔做港交所總裁，視若等閒，如果佢認為馬斐森係芸芸港大校長申請人之中嘅最佳選擇（best choice），左丁山絕不懷疑，佢一定係本住港大最佳利益辦事之人。但陳婉瑩可能會問，為甚麼沒有「更好嘅人申請呢份工？」木宰羊！