前幾日資金仲傾斜喺科網股、半新股同奶粉股，不過去到噚日，形勢有180度嘅轉變，除咗A股造好、港股升204點之外，上述三個板塊全部逆市跌，資金回流番去中資股，內房股升到爆晒燈。
人行放水力度超預期
究竟乜嘢消息咁巴閉，原來阿爺噚日又做咗650億元人民幣嘅逆回購。喺國慶黃金周前，人行已經連環做大額逆回購，曾經單日做咗880億元，不過主要係為咗內銀喺9月底應付季結考核，加上黃金周資金例牌需求較大，為免資金緊張，先做咗大額逆回購。噚日好明顯唔同，所有資金難關過晒，依然做大額逆回購，反映人行放水力度比市場預期更強，對中港股自然有利，噚日個股癲升得有道理。
另外值得留意嘅係，美國玩緊債務上限爭拗，資金湧番去亞洲市場，同時因為債務上限好大機會令聯儲局10月唔收水住，換言之，中國放水，同時美國又放水，喺風平浪靜市況之下，呢個情況自09年8月到𠵱家相當少見，環境咁利好，有機會刺激港股出現顯著升幅。回顧番中美同時放水嘅劇本，恒指例牌點都上到24000至25000點，今次相信唔會例外。
再睇遠啲又點？如果從月線圖觀察，恒指MACD指標避開沽售訊號已經靚絕；睇埋保歷加通道，2011年8至9月歐債危機期間，曾經跌破過月線下軸然後先回升，去到今年2月向上挑戰上軸不果；然後今年6月再回落跌破中軸，但未下試下軸隨即大幅反彈，今年內有再度挑戰上軸（24300點）嘅勢頭，長線有一浪高於一浪嘅表現，好大機會突破2月高位。
至於08年5月到𠵱家形成嘅對稱三角形阻力線（現延伸至23450點），只餘300點距離，以月線圖連環陽燭嘅強勢，向上突破亦指日可待，港股正以中長線升浪進發，但現階段絕對值博。
保利破位 上望6.88元
晉佳唔敢睇小中資股，睇噚日人行大額放水，內房股就癲升，主要有三個因素：第一，內房股9月到𠵱家最落後，幾乎冇升過；第二，黃金周內地一線城市銷情唔錯，有好消息墊底；第三，內房股缺點比一般周期性股份為少，成為資金短線首選。
第三個因素可以略為解釋一吓，內房銷情相當理想，價量齊升，賣樓回籠現金增加，可以紓緩重債因素，形勢總好過生意未見起色嘅資源股、高檔消費股。以圖論勢，保利置業（119）周線圖連番守住保歷加通道中軸，𠵱家爆上分分鐘係嚿年10月份嘅翻版，絕對不能睇小，破埋通道上軸5.25元嘅話，目標價上望今年高位6.88元。
另外，低檔內需股都係相當值得吸納嘅板塊，有機會再為大家分析。
晉佳
本欄逢周三刊登
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange