日本年輕人冇錢買車，搞到車廠好頭痕。當地汽車巨頭、豐田社長豐田章男最近親自出馬去大學演講，希望向青年重新推銷日本的汽車夢。
豐田章男兩個禮拜前，去咗明治大學講talk，佢對住該校900名學生，一開始就講以前細個，要有架車先敢開口約女仔去街。根據彭博社報道，豐田章男嘅講話莊諧並重，但目的只有一個，就係想日本年輕一代重新愛上汽車。
豐田社長咁用心良苦，都係因為日本人口老化問題，已嚴重影響當地汽車工業。據經合組織數據指，過去15年來，日本打工仔平均減咗15%人工，難怪日本青年對買車興趣不大。有日本投行研究仲話，年輕人與老一輩唔同，佢哋對iPhone之類的科技產品興趣更大，亦唔會有足夠嘅錢買車。
其實豐田兩年前已經搵咗影星尚連奴同山下智久等人，拍咗幾段真人版《多啦A夢》廣告，催谷豐田銷情，不過似乎未達到預期效果。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24