在印尼峇里採訪亞太經合組織會議的now新聞台等多名本港記者，向菲律賓總統阿奎諾三世發問有關馬尼拉人質事件的問題後，被沒收記者證。特首梁振英表示，對於未能為記者取回證件，表示不好意思。梁振英之回覆，實在令人跌落地！WTF！
狼英有冇上心 一睇就知
你係特首，呢個係公職，係一個角色、責任，唔關乎個人喜好。香港記者受辱，印尼與菲律賓夾計整蠱傳媒，中國外交部詐唔知，特首無能就早預咗，但唔該回應proper小小，「唔好意思」並非官式用語。如果梁振英認為印尼及菲律賓有理，香港傳媒攞嚟衰，就更加唔需要「唔好意思」。至於道理在香港傳媒一方，取回記者證乃天經地義，梁振英呢句「唔好意思」，就更加令人討厭，擺明側側膊，知道自己做唔到嘢，又驚俾人鬧，於是扮「天真幼稚」求過骨。一個正規合適回應，應該表態對未能取回記者證表示遺憾，向印尼及菲律賓政府做法表示遺憾。
至於佢同阿奎諾三世所謂會面，就更加令人氣憤。擺到明阿奎諾三世係玩嘢，「菲律賓冇代人道歉文化」，根本牛頭唔答馬嘴，砌辭狡辯，最終又係指派官員繼續商討。過去三年特區保安局同駐港菲律賓領使商討過幾多次？有乜嘢成果，大家都見到。任何外交交涉，重點不在會談，而係背後有冇行動backup，三年來除咗黑色旅遊警示外，中國外交部及特區政府為人質慘劇根本無外交行動，迫使對方道歉賠償，阿奎諾三世當你梁振英係儍仔乃理所當然。
三年前人人目睹黎剎公園上菲律賓軍警那場拯救鬧劇，根本就係間接害死人質，司法部長德利馬第一份調查報告出台，指巿長、副市長、警察總長、特警、內政部副部長各級均有犯錯，建議作刑事及行政起訴，不過被阿奎諾三世推翻，家屬要求菲律賓政府正式道歉，賠償乃天公地道，連一個咁基本嘅要求，特區及中國政府都做唔到，而梁振英在會談時，九唔搭八，用香港南丫島海難去反駁，反映佢事前毫無準備，兩件事性質根本不同。佢只要熟讀德利馬第一份調查報告，就已經足以當面駁斥阿奎諾三世，究竟梁振英有冇上心，大家一睇就知。
至於北京，2011年8月30日阿基諾三世訪華，不僅取得總值70億美元的經貿合同，更成功爭取中方開放更多人員赴菲旅遊，兩國亦同意將2012至2013年定為「中菲友好交流年」。香港人仲唔明，在務實外交下，人質家屬訴求掃咗入床下底。香港花咁多錢搞國情教育，連港大新校長也被梁粉教授指摘不懂國情，講到尾，所謂國情就係為國家之無能作自我辯解，明白國家之苦衷、難處，唔好死咬住唔放。所謂國情，其實通通係藉口。平時大吹大擂捧強國上太空，解放軍耀武揚威，大國崛起，但香港人感受到做中國人嘅應有尊嚴嗎？
添馬男
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24