巴塞隆拿嘅丹尼爾同布斯基斯，經常喺球場發揮精湛嘅演技，係西甲出名嘅「影帝」，之不過「港版巴塞」傑志嘅西班牙籍助教盧比度（Chino）都唔輸蝕，仲真係走入大銀幕，化身巴西黑幫大佬同影帝周潤發飾演嘅賭神高進大鬥法！
Chino日前喺facebook放咗張同發哥嘅合照，自爆有份拍王晶執導嘅賀歲片《賭城風雲》。我求大俠知道後，梗係唔會放過呢個機會，噚日一早去睇傑志操練，追訪吓呢位影壇新星。之前有拍過剃鬚刀廣告嘅Chino話，原本都冇諗過拍戲，之但係有朋友話《賭》片需要個識講葡萄牙話嘅角色，覺得佢適合叫佢去試鏡，點知一拍即合，8月就正式開拍。
「拍戲仲難過踢波」
「第一次拍戲真係好excited！比踢波難好多，所以起初真係好緊張，但好在發哥同導演都好照顧我，上個禮拜終於都順利完成拍攝。」Chino處男下海，但佢都好有職業道德，除咗多謝球隊支持佢拍戲外，仲點都唔肯爆自己喺戲中嘅角色，只係希望套戲喺下年上映後，會有更多人搵佢拍戲；鍾情香港文化嘅佢，最想拍嘅係笑片同功夫片。
不過，Chino唔講，導演王晶就爆料，話場戲其實係講世界各地嘅黑幫大佬，去澳門出戰一場賭局，當中Chino就係嚟自巴西嘅大佬。唔怪得知Chino個造型咁似一代打星陳惠敏啦，論台型點都勁過賭魔陳金城同佢契仔侯賽因，至於演技就真係拭目以待喇。一班傑志兵仲講笑話，要問佢攞首映戲飛去捧場㖭。
盧均宜好快做老竇
除咗Chino撈過界，爭做影壇最佳新人之外，傑志仲有喜事一籮籮；門將王振鵬榮升爸爸之餘，聽日29歲生日嘅盧均宜更加雙喜臨門，宣佈未婚妻Canmy有喜；將喺月底結婚嘅均宜強調唔係奉子成婚︰「其實之前已有plan今年生BB，只係婚期夾唔啱時間啫。」
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24