【銅鑼灣加路連山道】下月中就踏入女人三十一枝花年齡嘅李彩華（Rain），雖然成日影到身邊有好多觀音兵，不過仲未有一個被肯定係正印，為咗喺生日前急脫剩女之名，呢排喺香港嘅Rain又頻頻出動同異性約會。前日下晝5點幾，全身黑色打扮嘅Rain出動，佢先獨自去銅鑼灣時代廣場買化妝品，向店員查詢時又唔停咁打電話，估計係買完嘢約朋友趕下場。
人約黃昏後
Rain早前坐四眼男價值480多萬嘅McLaren跑車出巡，不過猛男架戰車大前晚喺大坑撞咗，當時未見Rain喺現場。Rain前日改為步行出巡，佢見買嘢冇收穫就急急腳離開，獨自步行向南華會方向，原來佢人約黃昏後，約咗個身形圓碌碌嘅中男撐枱腳。
Rain同圓碌男會合後，就去咗加路連山道嘅Burger Room，由於呢間係快餐店，圓碌男先安頓Rain坐好，佢就發揮男士風度負責去柯打食物，跟住佢哋就喺窄窄嘅小枱對望嘆漢堡包，認真sweet！佢哋全程講唔停，似乎Rain好冧對面呢位圓碌男，佢食到一半又顧及儀態，拎紙巾係咁抹嘴。雖然話係快餐，但佢哋食得一啲都唔快，食咗成個半鐘先走人。Rain步出餐廳馬上發現被影相，圓碌男立即行先，仲用佢圓碌碌嘅身軀掩護Rain離開。
採訪、攝影：畢紹基、朱志聰
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com睇番足本網上版，除咗有專訪外，仲有好
多時裝靚嘢睇！