肥仔K曾經𠝹傷咗左手大拇指，到大埔那打素醫院求診，前後搞咗兩個鐘頭，呢位八十後等得不耐煩，立即俾一位師奶「窒」佢，話到北區醫院可能等足一日呀。整個新界東有咁多人口，只有三間醫院叫得出，就係威爾斯、那打素，與北區，唔怪得醫院日日塞爆。大埔本來有一幅醫院用地，但招標流標，現在有消息話特區政府想將幅地改變用途，用嚟起公屋，不再起醫院，實在令人失望。公屋當然重要，但到處起公屋之餘，梁振英、張炳良兩位唔該諗一諗，公屋用地大多集中在新界，唔通公屋居民個個係鐵打，健康到極，唔會病，唔會入公立醫院睇症嘅？佢地又唔生仔生女㗎？搬幾十萬人入新界而唔諗加多一間至兩間新醫院，實在匪夷所思。
建築邦上星期到伊利沙伯醫院探病，入到病房就嚇咗一驚，佢話病人病床之擠逼程度，非親歷其境，不能形容，佢探訪之病人住在兒科病房，情況稍為好啲，病人本來住在沙田，有急病就坐的士衝往伊利沙伯，伊院一度拒絕佢入住，要佢返去沙田入威爾斯，但是病人在九龍聖德勒撒或是浸會醫院出生，出生時曾有事故，轉送伊利沙伯診治，之後不斷覆診，病歷全在伊利沙伯，所以父母堅持不送佢入威爾斯，要入伊利沙伯，係有情理根據嘅。曾有醫管局高層同左丁山講過，伊利沙伯雖然比例上佔用多啲醫管局資源，如梁家騮議員指稱過，但同時九龍各區居民比較喜歡送親人入伊利沙伯，故此該院病人特多，唔通全部拒諸門外咩，正是罵人須有理，梁議員不妨虛懷啲，多啲視察實情。
建築邦探完病，覺得梁振英高永文要提升民望嘅話，可以立即宣佈起多兩三間新醫院，以解香港人睇病之憂。未來十年人口繼續老化，長者病人不斷增加，青年吸毒人士十年後就會患上嚴重肝病、膀胱病，要與長者爭醫院病床，加埋正常出現之病症呢，公立私立醫院會天天「全院滿座」，納稅人唔通要飛去泰國睇病？喂，冇醫生噃，點呀？有啲組織阻住地球「轉」，係要阻止外國醫生來港執業，梁振英夠膽講過要「碰一碰利益集團」，但到目前為止，完全唔見到佢有動作去碰一碰醫霸噃！