立法會唔少壯丁平時都有做運動，以保持至fit身形，噚日五位立會男飛魚下海，同千幾名參加者一齊游渡海泳，佢哋就係有政界方中信之稱嘅自由黨鍾國斌、民主黨胡志偉、泛民梁繼昌、建制馬逢國同吳亮星。雖則係壯男咋喎，但佢哋都話頭嗰幾百公尺要同人鬥批踭兼互踢，唔容易捱㗎，其中馬逢國被批到幾乎甩骹，所以游咗300公尺就提早上水。
千幾人一齊落水
其實馬逢國一早試咗水過關，證明實力有番咁上下，點知實地作戰竟然甩轆，佢同八方講，噚日天氣一流兼水質唔錯，好啱游水㗎，可惜實在太多人一齊游嘞，而且唔少人好有爭勝心，一路游一路俾人係咁批，結果膊頭好鬼痛，游到300公尺頂唔順要上岸，疑似甩骹。
梁繼昌同鍾國斌就順利以40分鐘游完全程，但都呻幾句空間唔夠。其中梁繼昌話賽道太窄，優悠組成千幾人一齊落水，到最後500公尺先可以鬆動啲發吓力咋，佢同鍾國斌仲預告，下年要報比賽組至得，因為一組得100人，咁就唔使咁逼啦，至少唔使好似馬逢國逼甩骹咁慘。
唔好睇小新嘅立法會財委會主席吳亮星細細粒，佢都奮力游足全程；但當中至有鬥心應該係胡志偉，事關佢試水成績唔夠好，最後獲大會邀請做下水禮嘉賓游約300公尺，點知最後奮力游足全程，佢話賽前冇特別訓練㗎，總之以完成賽事為目標，佢就認為賽道中要泳手接受檢測嘅中途站範圍好窄同危險，希望大會改善吓啦。
李八方
mailto:[email protected]
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24