新股雲遊（484）一鳴驚人，上市兩日累升四成，帶動網遊股紛紛破頂，但竟然有隻網遊股，仍較09年高位19蚊水平低近七成，講緊嘅就係光宇國際（1043）。
點解落後得咁緊要？其中一個原因，就係唔係人人清楚佢嘅真身。表面睇嚟，佢係一隻電池股，實際上仲有網遊業務。根據中期業績，網遊對集團盈利貢獻6,381萬人仔，年度化折約1.6億銀，保守啲用20倍PE計數，公司市值應理有32億銀，但上周五光宇市值僅23億銀，完全反映唔到光宇呢隻會生金蛋嘅鵝嘅價值，還未計原本嘅電池業務。睇番光宇今年主打嘅網遊《靈魂戰神》，屬全球首款無鎖定策略類動作game，成功吸引講求新意嘅機迷，早前推出測試即刻令試玩區逼爆，光宇作為遊戲獨家代理，今年肯定大豐收。除網遊外，集團亦有團隊研發手遊項目。
值得留意嘅係，光宇早前宣佈出售光宇電源4.8%持股，獲利1,071萬人仔，並透露會發展及擴大其他業務，講緊嘅好大機會係網遊及手遊業務，一旦業務進入軌道，搞分拆乃遲早事情，屆時公司價值將進一步釋放。光宇上周五破旗而上嘅一棍，相信只係新一輪升浪嘅開端。
唐牛
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24