澳門博彩業近十年越做越大，每年閒閒地都有成3,000億元賭收，搞到周邊好多地方都想玩埋一份，就連羅兵咸永道都估計，亞太區去到2015年會取代美國，成為全球最大的「賭場」。
啱啱攞到2020年奧運主辦權嘅日本對於開賭就最為積極，一班議員亦已經準備緊法案，希望喺今年內可以交畀國會，最快2019年有首間賭場開業。
不過班議員可能見識過澳門十幾年前未正式規範博彩業嘅時候，當地黑幫為爭奪賭場利益日打夜打，街頭槍戰、江湖仇殺多到連警察都冇晒方法，十足十玩緊近期大熱遊戲《GTA》咁。
為咗避免日本賭場受到黑幫勢力入侵而令當地掀起一場腥風血雨，日本議員已經喺草擬法案上講明要趕絕山口組等嘅黑勢力。除咗建議將開設賭場嘅入場門檻定於較高水平，確保賭牌主嘅質素外，亦會對賭業參與者進行嚴格的審查，包括要求賭場的高級管理層提供過去10年嘅銀行戶口、信用卡戶口及稅務資料，以證明身家清白。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24