睇住港大「國粹佬」、「梁粉」背景教授，紮紮跳撲出嚟，完全唔顧學者知識分子身份，狂噬新校長馬斐森，立即觸動咗我CSI查案嘅警覺性，Must be something！
如果主席梁智鴻程序上失當出錯，為馬斐森拉票、種票，在校內以蛇齋餅糭撥款收買各院長，大家之憤怒還可以理解，但整個遴選過程符合程序公正，而最終揀出馬斐森，盧、陳、程三位教授「擘面式」開拖，究竟真正目的何在？
第一學府變第一社團
三人完全over晒，過火式攻擊馬斐森，相信是一種警告。細心睇三人言論，根本並非理性討論，若人選中有條件比佢明顯優越，於權威期刊出論文又多，又有知名學府行政管理經驗，又熟知國情，中文嫻熟，最終落選，盧教授有份參與遴選，應該公開內情。若根本應聘者之中，冇此條件人選，正如梁振英、唐英年二人揀一人，基本上只係揀個冇咁衰，三尖八角巖巖巉巉，三人之發難，就令人奇怪。荒謬情況就如今屆亞洲小姐選舉，各花生友質問王征點解入圍佳麗冇個比得上港姐，點解女版王祖藍也入圍，究竟錯在女版王祖藍、王征，定係ATV？大佬，你亞視個朵搞到咁，樣好身材正寧願去做𡃁模都唔會去選亞姐。港大自8.18之後，處境同選亞姐有何分別。
校董會主席梁智鴻人老精，818佢老人家最終要收拾殘局，扶住徐立之面對群眾學生，當中內情及港大管理層表現，佢最清楚。搵個鬼做校長，就係要希望學府重回正軌，做番一間學府要做嘅角色。但明顯另一批人希望將港大帶入政治之中，成為中國高等學府第一位，在內地大搞分校，錄取更多內地尖子學生、研究生、博士生。內地教育就是政治，凡事均有代價，港大要在內地發圍，校長當然要懂國情，或者「識做」。
大家只要睇睇過去兩年港大學生會俾一班熟悉「國情」學生有計劃有組織地滲入，最終更鬧出拒絕落莊交出銀行戶口等醜聞，可想而知，香港大學處於政治風眼位，只係大家唔多覺。
而三大教授互相呼應狠批馬斐森，當然知道無法改變任命，但狠話說盡，猶如社團式警告，唔該你「好自為之」，凡事要照顧國情，唔好自把自為，唔好怪我唔事先警告你！
堂堂第一學府教授，行事竟如第一社團，校長未上任已搞成咁，你話港大會唔會有風平浪靜好日子！
添馬男
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange