白鴿黨上周五喺尖沙嘴筵開逾50圍賀19歲生日兼籌款，身為黨主席嘅卿姐，當日全天候high爆。咁又係，擺明唔請狼英，都依舊有林鄭同鬍鬚曾兩位司長到場，算好有飛士㗎嘞，事實上呢，就連好多「梁粉」行會成員都有現身，包括張志剛同羅范椒芬，羅范仲同卿姐攬到實一實，在場人士都睇到眼凸凸：乜兩位惹火女士咁friend㗎咩？
卿姐當日high爆實錄，真係數之不盡，除咗頻頻同來賓攬頭攬頸，亦一度變身「模特兒」，喺台中間行catwalk，同台下嘅嘉賓粉絲握手。而佢自家製嘅8樽「卿姐醉雞」，就算賣成5,000蚊樽亦好搶手，岑建勳一口氣掃咗4樽。向來都入得廚房嘅卿姐話呀，如果想要可以上門整㗎；為咗白鴿黨籌款，佢可以去到好盡。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange