公認演技派的劉青雲，刻下有名有利，眾人眼中平步青雲，實則荊棘滿途，最幸運是拍無綫劇《大時代》時認識了太太郭藹明，成為圈中模範夫妻。青雲入行初期也曾沉寂過，在金像獎八次提名下，07年才首封金像獎影帝。時至今日，青雲仍在影壇拼搏，全因他喜歡演戲，希望做得更好。影帝背後，他跟普通人一樣，會逛街市、食大牌檔及入戲院睇戲，享受平民人生。
撰文：溫敏芝
現年49歲的劉青雲，83年加入無綫藝員訓練班，翌年憑無綫劇《新紮師兄》中的Fit佬一角彈出，可惜之後又沉寂了一陣子，演藝路不算平坦。幸運的當然是92年拍無綫劇《大時代》時認識了太太郭藹明，兩夫妻經常出雙入對。90年代，青雲開始踏足影壇，拍過多齣令人難忘的電影，如《忘不了》、《神探》及《竊聽風雲》等，演技早獲大眾認同，可惜偏偏苦等多年，至07年在他第八次提名下，才憑電影《我要成名》首封香港金像獎影帝。
最緊要開心
近年已很少接受報章專訪的青雲，日前在元朗接受本報訪問，如今已是影帝級的他，有名有利，事業又有成就，仍有甚麼追求？青雲說：「𠵱家追求嘅係希望自己做得更好，我唔敢話自己有好大成就，盡量發揮自己啦，我冇乜嘢想做而未做，好多時係睇導演想拍乜嘢，就算重複性格、職業都唔緊要，好似最近我都接咗部精神病人嘅戲，個角色同我以前演嘅《神探》唔同，我都會想試吓。」
當年一起拍無綫劇《新紮師兄》的梁朝偉已蜚聲國際，成就及身家皆有，偉仔也說過已無所求，只求開心，青雲又是否抱這種心態？他說：「開心好緊要，好多事冇辦法做到十全十美，或者做到如自己所願，個人嘅睇法好緊要，開心啲、樂觀啲，都會令你身邊人輕鬆啲。」青雲坦言沒想過自己會變成一個怎樣的演員，或者蜚聲國際，他只會保持自己的態度，將工作做好：「因為機緣嘅嘢冇得強求，遇到乜嘢角色想做就做。」
愛去大牌檔
影帝級當中，青雲算是數一數二的平民影帝，絕無架子，這位影帝私下的生活又會怎樣？他笑說：「我同普通人冇分別，唯一唔同係我怕多人，唔鍾意去多人嘅地方。我同其他人冇分別，會去街市、大牌檔，我希望自己嘅生活唔會受工作影響太大。不過有時都好難，有時喺大牌檔食嘢，可能會感覺到有人用手機影緊你。」問他是否已習慣？他笑說：「習慣就唔習慣，但都冇所謂嘅。」
入行後，青雲拍過多齣電影，《暗花》、《新不了情》及《竊聽風雲》等都是他喜歡的作品，電影一部接一部，有否厭倦了拍戲生涯？青雲說：「有時都會攰，但我好鍾意呢份工，有時攰會休息吓，去吓旅行先。我鍾意工作令個人集中啲、有精力啲，如果唔拍戲，就會唔注重飲食。」他在影壇合作得最多的男演員是古天樂，與他演戲有默契，但卻不似古仔喜歡在家中睇戲：「我鍾意喺戲院睇多啲，啲戲好睇啲咁，我試過租碟，所有嘢都差啲，喺戲院睇感受好唔同。」
青雲的好友黃秋生、吳鎮宇都曾作多方面發展，秋生會演舞台劇，鎮宇就嘗試做導演，但青雲卻從一而終選擇演戲，他說：「我鍾意集中做一樣嘢，做導演要好長時間準備，如果有個故事好想拍都會試，但唔會為咗想做導演而去拍戲，做導演係好複雜嘅工作，每日要應付太多問題。」至於會否演舞台劇？青雲表示曾經有人找他，但他暫時未有這個打算，畢竟他始終喜歡電影。
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！