現年78歲嘅曾江嘅經典美源髮采廣告由70年代播到𠵱家都仲播緊，「乜咁煩呀？白頭髮？你又煩？搽咗啲咩呀？黃甘甘咁嘅？學我啦！梳啲美源髮采，逐漸變黑又得，立即變黑晒亦得，得咗。」真係香港人嘅集體回憶。
播足40幾年
不過，原來曾江已經唔再用美源髮采，轉咗隻新嘅染髮劑。近排佢幫另一牌子染髮霜拍咗個新廣告，廣告中有人笑問曾江：「你仲係用緊嗰隻染髮呀？」跟住一頭濃密烏髮嘅曾江自豪咁話：「我用緊Salon de Pro染髮霜，你睇啲頭髮，自然柔順冇味又健康。」
馮仁昭噚日打畀曾江，佢話今次酬勞幾好，講到美源髮采廣告好深入人心，佢話：「希望呢個更加深入人心囉，我啲廣告OK㗎，唔係亂嚟，我試過先至做㗎。」
曾江當年拍美源髮采廣告，因為合同冇寫明播放期限，所以個廣告播足40年佢都冇得分紅。噚日問曾江係咪覺得被搵笨？佢就話冇，始終當年唔清楚呢啲年期問題，佢仲笑話：「耐唔耐見到自己咁後生都開心！」今次新廣告有年期，但年期幾耐，佢就話唔記得。如果新舊廣告一齊出街，咪變咗曾江自己打自己？佢笑話：「我係染髮劑嘅權威嚟㗎嘛！」另外，曾江早幾日去台灣參加「不老騎士」活動，同40幾位平均年齡70歲以上嘅長者，分別揸電單車同綿羊仔完成310公里長征，真係好有魄力。
撰文：馮仁昭
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！