1923年，的士4毫子起錶，2013年底，市區的士將加價至$22，原來香港人已經打的90載。這「21個6」的升幅，已經足以反映香港人過去將近一個世紀如何的瘋狂。不知多少個從指縫間輕易流走的兩蚊雞，它的力量原來可以很大，不但牽動車租、牌價、司機情緒，甚至是整個投資文化。今天，當想到一個的士牌的牌價可以買一層樓，慨嘆生不逢時！
記者：陳芷慧
攝影：陳盛臣、林栢鈞、劉永發、陳國良
部份圖片由張順光提供
$2的厲害
全港逾一萬八千部的士獲行會批准加價，12月8日起落旗起錶劃一加$2，市區的士起錶價將由$20升至$22。香港人打的已有90個年頭，原來20至30年代，起錶價只是4毫，當時1蚊已經可以買30斤米。及至70年代的士普及化，的士起錶價亦只是$1.5。相比當年其他交通工具，巴士由筲箕灣至石澳收$0.9；一頓午飯平均都是$2。「你計一計，𠵱家食個午飯，平均$40，相比70年代$2升咗20倍；的士價格加至$22，相比$1.5只升咗15倍左右，的士價格比飲食的升幅低好多，原因係的士始終唔係必須交通工具。」
今次的士加價是由香港的士商會提出，的士商會主席黃保強解釋：「主要因為經營成本增加，的士保險費都好貴。重點唔單止加$2，仲有每跳錶由$1.5加1毫，自97年後沒有增加過。」其他團體或的士司機有何看法？
的士小巴權益關注大聯盟主席黎銘洪：「我投棄權票。舊年我原本否決議案，因為交資會通過議案之後，泰和車行伍熀已經想加租，佢話你否決我又加，唔否決我都加㗎喇！後來佢答應唔即時加租，我先唔反對。」
的士司機鍾尚志：「吓？車行點會同你平$2？你！呃！人！其實，物價貴，加車租在所難免，我預計5個月內一定加車租。不過，我最唔同意頭9公里加1毫變$1.6。你話，$3.2，我收唔收嗰兩毫呢？兩毫又冇理由收人哋1蚊，變相因加得減，引起不必要的爭拗。」
49個團體 玩分化
問及過往爭取的士加價最難忘的片段，黃保強毫不猶豫地回答：「一定係今次。唔單止同商會之間開會討論，舊年仲被立法會否決。今年6月喺立法會同政黨開會，講到聲沙。」其實，為甚麼香港有那麼多的士團體？根據運輸署資料年報，全港有全利電召的士聯會、城市的士車主司機聯會、汽車交通運輸業總工會 、的士權益協會等49個的士團體。「事緣1984年，香港政府運輸司施恪向立法局提出，批准的士加價的同時，增加的士牌費及首次登記稅，並即時生效。的士行業全無反對機會，引起業界強烈不滿。全港的士罷駛遊行，逼滿彌敦道，有人乘機搞事，擲石放火。事後政府覺得唔係好掂，鼓勵的士行業各自成立團體組織，無形中進行分化，往後有啲咩事唔會一面倒反政府。」的士司機鍾尚志補充：「唔止係咁。一個商會點夠牙力同政府周旋？車行、車主、司機各自成立唔同組織，一齊向政府施壓先有力量。」實情是人多意見多，車主、司機以及不同界別的群組，都需要維護自身的利益。
組聯盟因為李嘉誠
的士小巴權益關注大聯盟經常與香港的士商會唱反調就是最佳例子。「03年李嘉誠搞點到點的邨巴，首當其衝梗係的士啦，後來小巴都覺得有威脅，於是組織聯盟爭取權益。唔係每個商會都同我哋啱傾，好似我同黃保強經常唱反調，因為香港的士商會就正正係政府的喉舌。」不過，黎銘洪自言他跟黃保強總是「分歧地合作」，憶述他最難忘的鬥爭，必然是他提出「短加長減」的建議，黎以此引以為傲。「短加長減呢個建議係由我先提出，因為04年有好多八折黨，一般的士司機搵唔到一個長途客，加上好多去機場客都搵『雞記』，我提出呢個建議來應付。當時大部份的士團體都接受我建議，就係黃保強反對，因為我首9公里減2毫，去機場$300變$200。不過，後來的士司機多番長途客，仲刺激牌價上升，黃保強先讚我個建議正！」每次遇有的士議題，先見報的都是黎銘洪，雖然他只是小巴司機，從未揸的士，但為了坐穩主席這個位置，他每天重溫的士歷史，務求記者有問必答。「再講埋畀你聽，咁多次示威政府最快有回應，就係新界的士阻塞機場那件事，竟然加價唔加新界的士，我聯同幾個團體主席，悄悄地帶一個大橫額，潛進運輸署的活動中示威，之後連前特首曾蔭權都叫秘書打畀我問我發生咩事呀！」
牌價原是免費叉燒
現時市區的士牌價675萬元，越趨接近豪宅。的士牌照，原本這塊免費的「叉燒」，因從政府限發牌照開始，變成一發不可收拾的炒賣工具，的士牌制度是怎樣訂立？1964年前，香港的士服務由八間的士公司經營，由警務處負責發牌，不時以配額方式發出新牌照，使的士牌照的總數，約相等於私家車牌照總數百分之三。到1964年，政府以招標方式發牌。黃保強憶述：「當年係暗標申請價高者得。73年政府發100個的士牌，我用11萬買咗一個。唉！當時政府係根據庫房需要增發牌照，3個月後政府竟然又發1,000個牌，牌價跌至8萬元，3萬蚊差價已經可以買到當時新樓北角新都城，識得有行家接受唔到呢個事實患咗精神病。」
80年代瘋狂發牌
70至80年代，香港人開始瘋狂炒賣的士。黃保強：「77年24萬買第二架的士。當時$2,000分期供車會，將舊的士跟銀行貸款，再分期供多一架。如果當時我聽阿媽講，用24萬買寶馬山，𠵱家仲發！1,350呎仲有車位，現在值2,000萬，月租6萬呀！不過，做人要為自己決定負責任。」自82至84年兩年間，政府每年增發1,200個牌照，的士買賣投資非常活躍，車行發展蓬勃。牌照增加，自然影響的士司機飯碗，基本每年的士商會都向政府提出加價，銀行亦見有穩定牌照而發展貸款生意，如當時萬國寶通銀行支持運通泰車行投的士牌照。「當時牌價易升易跌。80年代佳寧集團發展的士業務，牌價由11萬升至30萬，後因陳松青捲入詐騙案入獄，牌價回落至10多萬元，後來中資珠江車行得鹽業銀行支持積極參與的士牌，價格狂升至60萬。」
84年以後至91年，每年發出少於300個牌照，而自從94年以來，當局只進行了兩次公開招標，直至97年。申訴專員公署在97年，發覺未能遏止的士投機活動，建議運輸署加強監管。「97年牌價升到最高350萬，金融風暴先至回落至180萬，之後一路創新高升到05年375萬停咗一段時間，06年回落至320萬左右，所以好多當時將退休的士司機喺09年至2010年初牌價升至380萬就心急賣晒去，再租車。」誰知，因外圍因素影響，去年牌價竟升穿700萬。「因為10年房地產剔出投資類別，買樓唔當投資移民，車行梗係有預謀啦！叫人投資的士，簡單方便，所以𠵱家有好多新興的士行就咁解。政府會唔會再發的士牌？回顧多年，我諗佢唔會輕舉妄動。」鍾尚志說。
的士界抗爭
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24