意甲周六夜場上演一場重頭戲，國際米蘭在主場惡鬥目前的「1哥」羅馬；羅馬開季6連勝，球員個個狀態弗，加上對上兩次造訪聖西路對國米都贏波而回，今場亦有信心可保不敗，受讓平/半要下盤。
國際米蘭及羅馬目前都在意甲未嘗敗績，但後者6戰全勝，而國米上周意甲被卡利亞里逼和1:1後，現時4勝2和，4分落後。國米在新帥馬沙利領軍下，攻守較去季平衡，但球員有時不夠專注，像對卡利亞里一役，便因防守欠緊密，被敵軍一記中距離射門扳平。
相比下，今夏改由魯迪加西亞執教的羅馬更見霸氣，連他自己最近接受訪問時，也自誇球隊可望回到史巴列堤執教的年代，崇尚賞心悅目的地面組織。羅馬目前進攻不乏人才，在4-3-3陣式中，速度快的謝雲奴及費奧倫斯在左右兩路竄擾力甚高，可引開敵衞令中路大空，使埋門力強的托迪、拿積及比真歷經常受惠，而今場比賽亦可利用這一優勢，向國米輕出的左右二閘進擊；至於中場米高巴特利及右閘馬爾干雖未復出，但對陣容影響不算太大。
羅馬上季意甲及意大利盃兩次作客國米都勝出，亦可增添心理優勢；既然目前6連勝氣勢強，怎計亦有望保住不敗，受讓下盤值得去馬。文：東尼
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange