記者：「大文豪，鍾意睇乜嘢書？」周柏豪：「鍾意金融。」記者：「有冇睇晒佢（金庸）啲書？」柏豪聞言喪笑，尷尬說：「唔係喎，我係講金融financial呀！」經歷過家裏生意失敗生活拮据的他，沒有變成守財奴，反而鑽研金融投資股票和黃金，就算被譏笑大文豪腦殘，亦沒令他情緒病發作，柏豪只會越挫越勇！
撰文：余燕儀
因為一篇無病呻吟的水杯潮文，現年28歲的周柏豪被譏笑為大文豪，明褒暗貶，他坦言：「寫嘢唔係興趣，抒發吓感情啫。」問鍾意看甚麼書？他說：「鍾意金融、《窮爸爸．富爸爸》、人生哲理、每日一金句嗰啲書。」記者讚柏豪有品味識欣賞「金庸」，怎知卻是搭錯線，柏豪睩大眼喪笑說：「唔係喎，我講金融係financial呀，哈哈！」
出碟歌頌勇氣
柏豪坦言不喜歡看書，對於大文豪這個戲稱，他自嘲說：「我邊有墨水，雖然有寫歌詞，但我嗰類詞簡易易明，我唔係填詞人，心目中填詞人係林夕同黃偉文，所以大文豪呢個名係禮物嚟，有人講永遠好過冇人講，得益都係我，茶餘飯後笑吓都好，做呢行娛樂到人就娛樂到自己，喺呢行生存要逼自己成長，唔睇得化好快俾人淘汰。」
入行六年未被淘汰的柏豪，剛推出第八張專輯《8》，日前有疑似他的淫照在網上瘋傳，其後淫照男主角樣貌曝光，令柏豪甩難。他說：「全張碟講勇氣，剛入行做任何嘢都唔係咁順利，冇乜人識，硬住頭皮行出去好enjoy咁唱歌，我覺得呢種係勇氣，新人唔係個個咁好彩，入行第二年，睇住糧單得四位數字，我係一步一步捱出嚟嘅人。」
柏豪做新人時收入少，曾向公司借幾十萬，近年捱出頭終還清債項：「𠵱家唔需要擔心錢，同好多牌子合作出嘢、做騷、內地演唱會，都有投資股票、黃金，07年爹哋生意失敗，屋企由唔需要諗錢，到使100蚊都要諗，所以好珍惜擁有嘅嘢。」
做潮人唔襟撈
雖然嘗過捉襟見肘的日子，但柏豪沒變守財奴，還鑽研金融投資，他說：「時代唔同，𠵱家唔係金融風暴，投資分好多類，買藍籌可淨收息，唔會跌得好甘，橫掂啲錢擺銀行利息咁低。」講到頭頭是道的他，難道在股票上大有斬獲？他說：「夠買架平嘅車，有段時間都好活躍投資，拉勻嚟講係有賺，早排仲用六位數買黃金，𠵱家蝕緊，但相信黃金遲早會賺。」
現在柏豪是否對投資興趣大過唱歌？他說：「永遠職業先係首要，投資係畀家用媽咪、請人食飯、買嘢，事業搵到嗰嚿錢要嚟儲同搞生意，我想搞時裝網上生意。」做潮人？他說：「做生意佬，潮人好快俾人推冧。」潮山聰（陳山聰）跟何超雲分手後一無所有，柏豪曾與陳山聰傳不和，記者聞言即笑潮山聰被推冧，柏豪避忌說：「呢個唔談論，潮人會有其他潮人代替，所以我唔做潮人做老闆。」
同情抑鬱陳靜
初入行曾患情緒病的柏豪，會否擔心舊病復發？他說：「唔係唔擔心，但𠵱家知點面對，可寫出嚟或搵人傾；以前有情緒病要頂硬上，明白有抑鬱症藝人會突然消失，唔係人人處理到。」明白陳靜因情緒病玩失蹤？他說：「行內好多人有情緒問題，要自己搵方法處理，否則影響健康同工作，最後精神爆煲。」
柏豪自言多愁善感：「好易俾工作影響心情，唔能夠睇得好化，我唔係柏豪禪師，不過逆境時就要飾演禪師，譬如水杯件事，網民問我係咪腦殘？連阿媽都俾人話，我唔能夠唔介意，但要同自己講冇乜大不了，呢行遊戲規則係咁，我叫阿媽唔好諗，網民講嘢唔負責任。」
愛情方面，曾與何家千金超雲、超蓮，還有連詩雅傳緋聞的柏豪，其實有感情穩定的圈外女友，對緋聞他處之泰然：「冇乜特別，緋聞係工作一部份。」對於跟何家千金傳緋聞令知名度激增，柏豪笑說：「掉番轉，因為有知名度，啲人先傳我，不過呢件事令我上咗一堂課，學識點處理緋聞，𠵱家少答為妙。」
場地：Table 18 of apm 髮型：Cliff Chan of Hair Corner 化妝：Kris Wong
逢周五隨《蘋果日報》附送嘅時尚美容雜誌《add》雖然早已派完；
拎唔到書嘅朋友，可以上番《add》嘅官網 http://add.appledaily.com 睇番足本網上版，除咗有專訪外，仲有好多時裝靚嘢睇！