今時今日在香港打的可能很容易，但在英殖時期，只有上流社會才會乘的士，的士司機都身穿整齊老西操流利英語。黃保強說：「你樣衰，西人唔搭你車。」從前有平治、摩利士、柯士甸等的士車款，紅藍綠黃百花齊放的顏色，統一後消失得無影無蹤，正因如此，香港有巴士迷、電車迷，就是未見的士迷，資料也買少見少，遺下的只有對的士價錢的執着。
記者：陳芷慧
攝影：陳盛臣、林栢鈞、劉永發、陳國良
部份圖片由張順光提供
英兵坐車唔畀錢
時值60年代，「Star Ferry pier please！Quick！」一位身穿整齊Hermes西服的英國人坐進的士裏。的士司機挺一挺腰，回了一句：「Certainly, Sir.」的士司機當時心想：「好彩我都唔弱，着番套老西。」甚麼？在我眼前的老翁就是當年的的士司機，由1968年揸的士搵食，到今天當上香港的士商會主席，坐擁數架的士（數目不詳，免得嚇人），炎炎夏日依然堅持穿恤衫西褲揸的士。
「未有隧道之前，全部的士都喺港島區，英國人搭的士居多，見你樣衰唔搭你車，揀後面嗰架！所以今時今日，就算對住自由行，我都堅持着番恤衫西褲。」黃保強憶述。的士於70年代尾才開始普及，60年代乘搭的士的只有有錢華人和外國人。「以前考的士牌要考英文試，如從文華東方酒店去邊度，轉左轉右要識表達囉！好彩我十幾歲由大陸落嚟香港，嗰幾年放工讀英專，你唔識英文，啲外國人會踢你一腳。」他續言：「因為英兵每逢星期五就出糧，一定會去酒吧飲到醉醺醺，所以的士司機一定會去赤柱，載英兵返軍營。」飲醉咗仲識畀錢？「哼！啲英兵大晒㗎！佢哋成日話自己尿急，落車即跑至軍營附近的墳場，等你追唔到佢。又試過幾個英兵蒙住我對眼，即刻跑落車，佢哋唔怕警察，因為警察都驚被英軍捉上船軟禁一星期。不過，我後生好搏，成日打到佢哋一身彩。」不過，揸的士數十年，總有數個賺人熱淚的故事掛在嘴邊。「有一次，一位美國海軍陸戰隊士兵返碼頭，付錢時突然哭得死去活來。「佢話今次上咗船之後就冇機會再嚟，點解要幫越南打仗喎？有時食緊飯，同僚都會突然被射死，戰爭真係好殘忍。於是佢畀晒所有錢我，成60蚊咁多，等於我揸一日的士。」
揸車揸到心口痛
的士司機開一日工，最受罪應該是屁股，但以前？「揸到心口痛，哈哈哈！唔係講笑，以前的士一般都是Morris款式，軚盤頂住個心口好辛苦。」黃笑說。現在的士分為市區紅的、新界綠的、大嶼山藍的三款，但在未統一以前，的士款式五花八門，不同公司出產不同款式，紅、綠、藍、星號、金邊甚麼都有。1940年代至60年代之間，當時的士全部是歐洲及美國車，其中以摩利士、平治居多。「當時規模大的的士公司當然購買平治款式，最靚就係平治180及190，車身闊落。不過，當時冇人介紹入唔到大的士公司做。當時我喺先達的士公司打工。講起就永世難忘，上山頂就最驚，隨時上唔到去，上到去都會水滾，所以當時合和公司老闆胡忠會放定啲水桶喺度畀我哋加水。」時而1968年，香港引入第一款日產的士，就是消失多年，有傳將會重臨與豐田對壘的Cedric，當年第一架就是俗稱「大籮柚」的130系。自此，平治及其他美國車開始退出香港市場。「梗係啦！70年代的士已經普及，平治當時覺得的士影響品牌形象，梗係撤出市場。」
女人要嫁的士佬
父親鄉下過世，黃保強1960年隻身來港闖天下，當時只有13歲。之後他很快便考取車牌，學人揸白牌車搵食。「不過，警察成日放蛇，都係轉揸的士。唔易入㗎，當時只有5間大的士公司。你知唔知，當時的士唔可以隨意兜售生意，大公司先可以喺的士站等客，所以你睇返舊相，60年代碼頭的士都係同一款式。如當時綠色的明星的士，就壟斷咗由碼頭到山頂一段路。」雖然如此，黃說當年月賺$1,000，當時警察月入亦只有$500。揸的士，雖然不是大富大貴，但正如黃所言，的士養大了她家中4個女兒。「你有所不知，以前個個女人都話要嫁的士佬㗎！」在旁的女兒也忍不住咯咯笑。說到底，父親很偉大，尤其當的士司機的父親，雖然雙手只能控制軚盤來搵食，仍不得不時刻轉動腦筋，賺得更多。究竟的士司機可以有幾搏？「當時警察會追我哋車抄牌。不過，佢哋警車唔夠我哋靈活。佢哋當時啲警車冇遮擋，中間兩排凳背對背坐。所以警車追車，我哋即刻急轉彎，佢哋一定唔會追，因為佢哋一急轉，警察就會跌晒落街。所以，的士司機好多時喺牌簿入面夾$5，希望警察高抬貴手。」黃保強，年過七十，都繼續揸的士，「就係因為對的士有感情，對我一家都有恩。」黃保強沒有後悔當年沒把辛苦儲下的11萬買下寶馬山豪宅，卻買了一個的士牌。但今天，他在太古康怡花園也有一個安樂窩，誰不以這位父親為榮？
升旗和落旗
香港收藏家協會副主席張順光說，香港每隔十年就有一變，見於香港百年交通史。1888年纜車通車，及至1889年，英資電車公司眼見纜車的成功，加以港島區的填海工程，決定提供電車服務，而電車也於1904年正式通車。1910年巴士亦進入香港。至於的士，則在1923年於香港島誕生，由經營九龍巴士業務的九龍汽車有限公司，提供4座位「紅邊」的士，然後1926年才引入九龍。張順光補充：「不過，無論電車、巴士、的士，最初引入嘅都係英國二手貨，要你哋跟英風，又唔可以同佢一樣。」20年代的士，空車便插上紅旗（一支布紅旗），即「升旗」，有客人時便把旗收回，叫「落旗」。
不過，提及香港交通，巴士迷、電車迷、火車迷比比皆是，惟獨未見的士迷，關於20至30年代的的士資料實在有限。「要到1940年代末先有少許資料。而從我一大堆明信片收藏中，我仔細翻查，才發現原來50年代至70年代的士款式百花齊放。」張語罷，翻開一本珍藏已久的1948年記事簿。當年出品的記事簿，主要用來記錄日程，內頁第一頁則會印上香港主要機構的電話。簿中除了警署、醫院、「滅火局」電話，就是的士公司的電話了，因為當時的士多在渡輪碼頭及各大酒店門口等客，若要在其他地方上車，要電召的士公司。當時共有5間的士公司，包括中央、黃的、明星、九龍、金邊。
40-60年代 歐美的士
a. 40至60年代，的士都來自歐美，愛丁堡停車場外，平民乘人力車，有錢人乘平治的士，1968年始有日本產的士流入香港令其平民化。
b. 60年代平治190、5人座位的士車款。
c. 攝於彌敦道，前排右邊是柯士甸紅的，左為平治的士。
70-80年代 顏色統一
d. 1972年海底隧道落成後，的士顏色隨即統一，分為市區紅的、新界綠的、大嶼山藍的的士。而1984年，政府容許引入4座位的士。
e. 1975年Cedric推出330系列，行內俗稱「大白鯊」。
90年代 豐田天下
豐田1979年首次引入四圓燈設計的士，80至90年代期間不斷推陳出新。現在常見豐田的士就是始於95年皇冠金豐的士。1997年，香港豐田代理皇冠汽車及合誠汽車分別引入15架樣辦石油氣的士來港。及至1999年，石油氣的士完全取替柴油的士。2001年更禁止柴油的士進港。
2000年代 環保豪華版
f. 2000年，香港福特（Ford）汽車代理引入首批澳洲福特石油氣旅行版的士，有特大行李存放空間，但因維修費昂貴，03年已逐漸停用。
g. 2007年，豐田推出由7人座位改裝而成的混燃Alphard 5座位的士。
h. 2012年，豐田推出油電混合Prius的士，賣點是比石油氣更環保，惟車價稍貴。
i. 2013年，鑽的是一間為輪椅使用者提供點到點接載服務的企業，此為七人座位鑽的，輪椅可從後門推進車內。
j. 2014年將推售福特專為香港設計的Transit Connect LPG的士，該車採用雙趟門設計、超巨型行李箱空間，皆為香港首見。
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange