韓國馬舞大叔PSY憑一首《江南Style》走紅國際，出入坐靚車，有保鑣跟尾不在話下，出埠都坐私人飛機。今次他的私人飛機就飛到香港，目的是拍攝韓國名牌SOUL耳筒廣告。昨日PSY於尖沙嘴文化中心對出海旁拍廣告，導演是老翻PSY錢國偉。
保鑣跟車尾
廣告內容很簡單，錢國偉做一個普通肥佬，戴了品牌耳筒勁到可以變PSY，於是乎正版就現身，在跑車前和9個舞蹈員一齊跳舞，再講句：「Everybody can dance just like me.」過千萬酬金輕鬆落袋，難怪個人排場十足，錢國偉要在休息帳篷外等PSY出來影合照。PSY坐勞斯萊斯到場，離開時保鑣跑住跟車尾。
身兼兩職的錢國偉自言酬金比正牌PSY少幾個位：「有份演但冇同PSY同場，今次係品牌香港分公司搵我拍，屬於亞洲區廣告，佢跳舞嗰part係廣告公司整咗首新歌舞畀佢，始終馬舞已經係過去式。」問錢國偉有否和正版相認？錢國偉笑說：「我邊敢高攀呀！」不過他讚PSY貴為國際巨星卻待人友善：「佢都幾好相與，又冇怨言，所以拍攝好順利。」
採訪：魯萍
攝影：黃文偉
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24