【本報訊】本港零售業增長再次放緩，創出10個月新低。政府統計處公佈8月份零售數據，按年增長8.1%至387億元，增幅為去年10月以來新低。香港零售管理協會主席麥瑞琼指，數據除反映自由行購買力減少外，本土消費亦出現放緩，情況令人擔憂。
8月份零售業雖仍有增長，但增長速度只有單位數，遠低過預期。麥瑞琼坦言「7、8月係消費旺季，夏季大減價，上年同期基數又低，點知8月都係得單位數增長，令人幾擔心。」而9月份中秋節外遊上升，加上打風，「聽聞生意都唔係幾好」。
街舖有減租壓力
多項消費品中，耐用消費品銷售額按年倒退10.1%，一反年初至今5.6%正增長，引人關注。麥瑞琼指，耐用品數據如汽車銷售，往往可反映經濟狀況，「汽車銷售跌15.7%，見到市面上多咗汽車廣告，本土經濟未必太好。」
燃料銷售同樣由升轉跌，「揸車、坐的士、運輸都要用燃料，下跌唔係好健康」，她補充，港人薪金普遍上升情況下，消費反而減少，情況值得留意；但經濟前景是否轉壞，她不敢太早下結論。
麥瑞琼引述零售商指，內地推行《新旅遊法》下，黃金周「首日好平靜，唔旺」；她補充，內地旅客未必在黃金周首日來港，10月份零售表現仍有待觀察。但有商戶向她反映，不少街舖租金已有減租壓力，「你都見到多咗街舖落閘。」截至8月底，本港零售銷售額按年上升13.4%，麥瑞琼維持全年增長12至13%預測。不過，她相信至年底時市道仍有不少挑戰，「上年啲人落嚟搶奶粉，對消費嘅幫助都唔少；而今年上半年搶金，估計下半年唔會再出現。」
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24