FC廣州（廣州恒大）喺周三創歷史成為第一支打入亞冠盃決賽嘅中國球隊；由金元打造嘅恒大喺4強次回合主場4:0大勝柏雷素爾，總比數狂勝8:1晉級，將會同南韓嘅FC首爾爭冠軍。稱霸中超，亞冠盃只係叫緊糊，恒大已急不及待放眼年尾嘅世界冠軍球會盃。
恒大近年喺中超威盡，喺11同12年連奪兩屆冠軍，今季到𠵱家亦喺聯賽遙遙領先，大有機會完成3連霸。不過隊波嘅前身廣州足球隊喺近十幾年都經歷過低潮，名都轉過幾次，包括香雪制藥、日之泉同埋廣州醫藥，到2010年3月先由國內超級富豪許家印旗下嘅恒大地產集團收購。不過隊波喺10年被翻舊賬，話喺06年打假波被罰降班，但有條大水喉射住就冇有怕，不斷收購大量球星下，即刻贏中甲冠軍重返中超。
傳派員到摩洛哥探路
恒大人強馬壯，除咗有郜林、黃博文同曾誠等中國國腳級人馬，外援亦相當勁，有「中超美斯」達里奧干卡（孔卡）同埋巴西前鋒穆里奇。恒大喺4強贏波後，球員可以瓜分2,000萬人仔，未踢決賽已經累積收咗1.36億，遠超過冠軍獎金。雖然對球會老闆許家印嚟講錢唔係問題，不過4強次回合主場門票收入已經有1,800萬，都幫到唔少手。
恒大喺今屆亞冠盃嘅決賽對手係南韓嘅FC首爾，後者喺周三另一場4強次回合作客2:2賽和艾斯迪格拿，總比數贏4:2晉級。決賽首回合會喺今個月25或26（待定）上演，兩星期後踢次回合。雖然決賽都未踢，但據講恒大已經諗定年尾以亞冠盃盟主身份出戰世界冠軍球會盃，拜仁同明尼路都有份參加；有報道話恒大已經派咗工作人員去摩洛哥了解吓當地氣候同環境，認真有信心。
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24