胡杏兒同吳卓羲主演嘅無綫劇《衝上雲霄II》雖然已經播完，但夏晨（杏兒）同唐亦風（吳卓羲）將有機會喺新劇《醋娘子》繼續談情。《醋娘子》下個月先正式開拍，不過呢幾日杏兒佢哋已經要拍巡禮宣傳片，噚日凌晨杏兒上載咗幾張《醋娘子》劇照上微博，仲話：「還有他，今次不是晨風組合，是青準組合！」
原來劇中杏兒叫曹青，吳卓羲就叫計準，杏兒同時鍾意吳卓羲同羅仲謙，而且仲先後同佢哋結婚㖭！杏兒噚日喺電話度哈哈笑話：「今次真係一后兩王啦！噚日拍到今朝凌晨4點幾，初初以為部劇會拍得比較輕鬆，點知噚晚原來要吊威吔，因為要卡通啲，真係估唔到！」究竟杏兒最終揀吳卓羲定謙謙呢？佢就話未知喎！
吳卓羲拒拍易服癖
另外，吳卓羲噚日凌晨拍完《醋娘子》，下晝就去金鐘高等法院外同郭晉安、田蕊妮及張繼聰為另一部新劇《忠奸人》拍巡禮片。劇情講坐住輪椅嘅安仔，以唔正當手法幫張繼聰打甩官司，張繼聰於是送咗成篋錢畀安仔。近排好多網民想安仔做港版《半澤直樹》，安仔話：「呢個角色（半澤）個樣好誠懇，但背後可以做啲同個樣相反嘅事，同我喺《忠奸人》嘅角色性格有少少似，大家睇咗《忠奸人》先，覺得我做到呢類角色先再諗啦！」
至於田蕊妮就建議吳卓羲試吓做強姦犯同易服癖，不過吳卓羲就話：「如果真係拍易服癖，我諗阿媽會同我脫離母子關係。」
版主：陳基征
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24