成日話歐洲4大聯賽，但對香港人嚟講，其實都係得3大。英超場場播到足，但水晶客對諾域治的話，問心又有幾多人睇！德甲同西甲就揀嚟播，有大隊嘅比賽都有得睇。至於意甲就被人遺忘，今季未有電視台肯播，小弟就覺得好可惜，因為意甲近年不斷進步，幾支強隊都開始復蘇。
自從「電話門」後，意甲唔掂，亦開始冇人睇，所以電視台漸漸都唔播。但今時唔同往日，意甲正在復蘇，包括祖雲達斯起得最快，今季仲得到泰維斯加盟，實力更上一層樓。拿玻里就有賓尼迪斯掌帥印，陣中新兵如希古恩同連拿都係球迷熟悉嘅面孔。羅馬今季咁強橫，連謝雲奴都係咁入波，小弟都想喺電視睇吓「罪人奴」嘅表現，同阿仙奴時代有咩唔同。AC米蘭雖然唔多掂，但有巴神睇吓，娛樂性搭夠。
呢幾支意甲強隊都好有話題性，喺香港亦有唔少球迷，而且意甲開波時間好，唔似西甲咁多深夜波㖭，如果有電視台肯播，加啲宣傳，點會冇人睇！所以呢，小弟諗極都唔明，與其買蘇超嚟播，點解意甲真係冇人買！意甲今周有兩場大戰，分別係國際米蘭對羅馬，同埋祖雲達斯對AC米蘭，但相信香港都冇傳媒會做宣傳，所以小弟藉呢個專欄，通知各位球迷有呢兩場大波。但諗諗吓，其實冇得播都有樣好，有興趣嘅朋友唔使怕裝咗冇得cut，自己上網搵link就得啦。文：咖喱
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24