所謂唔怕生壞命，最怕改壞名，細路仔讀書時，身邊多數有位叫吳美麗、吳曉婷之類嘅同學仔，香港人一聽到就識得笑，估唔到呢類搞笑名去到上市公司都有。有隻被借殼嘅股仔上月正式改名為藍鼎（582），讀歪啲好似「難頂」。
普通話冇事 廣東話出事
好多內地公司老闆鍾意按公司英文名嘅讀音改中文名，以普通話讀可能冇乜問題，一用廣東話就好搞笑。
藍鼎前身係嘉輝化工，早前被內地藍鼎集團借殼上市，順理成章改名叫做藍鼎國際，公司英文名Landing，中英文讀音相近，但係一用廣東話讀，就好易讀成「難頂」。
今年中亦有隻新股優庫資源（2112）上市，齋睇字義冇唔妥，一讀就變成「休」褲，咁啱呢隻股當時要押後招股，一度被人笑佢冇「休」實條褲，於是甩褲。
除咗呢兩隻，仲有新利控股（1240）、仁瑞投資（2322），諧音分別係「伸脷」同過百歲嘅「人瑞」。噚日掛牌嘅雲遊控股（484）亦輕易令人諗起細路仔時經常被阿媽鬧「遊魂」。雖然呢啲上市公司名係幾搞笑，但係好處係易記，仲易記過本身嘅股票冧巴。
不過要數最有親切感嘅公司名，一定係阿里巴巴，佢最近日日見報，大家為省字數，就咁叫佢阿里，仲唔係最親切？不過佢能否成為香港上市公司仲係未知數，創辦人馬雲早前擺出一副唔志在嘅姿態，似乎準備棄港赴美，但佢近日又身在香港，唔知有冇彎轉嘞。
李華華
mailto:[email protected]
有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange