美國國會兩黨各不相讓，令政府無法取得新一年度預算撥款，華府被迫暫停部份政府服務，惟政府關門大吉屢有前科，所以環球股市初步反應尚算冷靜。不過，事件糾纏了三日仍然膠着，總統奧巴馬周三晚與兩黨巨頭會面，各方仍企硬不肯讓步，市場開始擔心糾纏落去，預算案撥款冇着落唔在講，最怕係國會係10月17日嘅死線前，都唔肯上調16.7萬億美元嘅發債上限，令政府無法舉債而違約收場，引發全球金融動盪。
儲局隨時押後退市
至今為止，市場相信共和同民主兩黨只係耍花槍，到關鍵時刻會放下成見，避免國家爆發債務危機。但無可否認嘅係，事件拖得越長，對經濟及市場信心嘅傷害越深。例如，美國1年期國債嘅信貸違約掉期（CDS），前日已升到逾兩年新高，反映市場不安情緒升溫。
雖則白宮至今只暫停部份非必要服務，對經濟影響有限，市場估計拖幾日只係唔見0.25個百分點經濟增長，但如果好似95年嗰次咁拖足21日，損失嘅GDP增長可能達1.4%，影響唔算細。
值得留意嘅係，雖然美股呢幾日唔算跌得多，但美元兌各主要貨幣就死晒火，原因主要有兩個。首先是美國政府違約陰霾下，投資者擔心美元資產質素下降，其次是美國經濟數據近期少少走樣，儲局對退唔退市之前已經心大心細，家陣政府關門唔單止阻礙復蘇，更累到好多官方數據出唔到，令儲局更難掌握最新經濟形勢，增加儲局押後退市嘅可能，美元唔弱至奇。
事實上，今年係FOMC有投票權嘅波士頓聯儲銀行行長Eric Rosengren，噚日亦認為政府暫停公佈經濟數據，令儲局判斷何時退市嘅難度大增，唔好話下個月，年底退得未亦充滿問號，拖拖吓，可能等到伯南克出年1月離職仍退唔成。
儲局上月中爆冷唔退市後，美元一直積弱，𠵱家國會兩黨又唔生性拒批預算案撥款，令美元雪上加霜，其中亞洲貨幣普遍表現唔錯，最出色係馬幣同印度盧比，本周分別上升約2%及1.3%，成個亞洲區僅印尼盾獨憔悴。
至於各主要貨幣，意大利國會兩院周三大比數通過政府信任投票，結束前總理貝盧斯科尼為保住其國會議員席位而策動嘅逼宮事件，消除持續多月嘅政治不明朗局面，加上歐洲央行行長德拉吉重申捍衞歐元嘅立場，刺激歐元本周升至1.3623美元，創出七個月新高。
而英鎊則升至1.624美元嘅八個月新高，美元兌日圓則至97邊，創一個月新低，相信美國債務威脅解除前，美元都繼續捱打。上周建議待歐元兌美元升至1.36時淡倉，周三成功開倉，若相信美國能安然度過今次危機嘅，可繼續持有，中線續睇1.335美元。
奇兵
本欄逢周五刊登
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24