上海新特區會否對香港構成威脅，言之尚早，我贊成蔡東豪講法，共產黨不容易將權力判出去，自貿區當然唔會成為租界，亦因為唔係租界，要做國際金融中心好難，除非將香港國際化程度拉低，將香港市場經濟背後核心價值改變。
北京對香港一制冇乜好感，尤其近年內地推銷「中國模式」，認為一黨專政，更有利內地經濟發展，呢種論調其實係陳腔濫調，八十年代研究亞洲日本及四小龍嘅美國發展經濟學、發展社會學，一樣歌頌日本、南韓、台灣、新加坡官僚成功實現進口取代發展策略，全力發展經濟，與拉丁美洲民主國家相比，亞洲四小龍專制獨裁更快推動工業化，創造經濟奇蹟。
搞文化事業 唔係鬥平
但「亞洲模式」好、「中國模式」也好，其實只適合工業化初期階段，用官僚手段去作資源分配，指導市場發展，無疑在效率上會取勝，也減少對跨國資本或企業依賴。但當跨過了進口替代階段，要持續維持高增長，便是靠自由化政策，釋放出新的生產力。今日官方論述所謂中國模式，只不過係宣傳工具，香港人心中明白，鄧小平改革開放30年，創造出高速經濟發展，是自由化，官方逐步放寬控制，交出權力，退出市場，建立市場秩序及法制嘅結果，改革成功同一黨專政冇乜太大關係，反而同約束共產黨權力有關。而目前經濟改革進入樽頸，國進民退，係因為上一階段產業自由化政策所釋放出生產力已用盡，下一階段在金融、貿易方面，無可選擇要走上自由化之路。
今日領導人有否79年鄧小平復出時的決心及氣魄，令人懷疑。因為只有船頭驚鬼、船尾驚賊者才會視香港為敵人，香港百多年來食四方飯，各方勢力匯粹，回歸後多少有點老本留下，才造就了國際金融中心地位，呢個係有機成長過程，唔係英國人規劃嘅結果。上海自貿區乃自製金融貿易特區，係官僚規劃產品，公公婆婆眾多，要取代香港，未係時候。內地過去五年，全國大城市均圈地設立文化創意產業園區，但文創產業唔同做山寨工廠，講求創意人才，資訊自由流通，建立一個鼓勵創意氛圍。到今日內地文創產業園成功者寥寥可數，點解？文化產業、金融業同製造業有好大分別，背後涉及當地軟實力，而非一味靠平價批地、廉價民工。
添馬男
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24