杜琪峯執導、楊千嬅、古天樂、高圓圓同周渝民主演嘅《單身男女2》拍到接近尾聲啦！前日杜Sir拉隊入石澳沙灘拍攀石嘅場面，只見古仔同千嬅全副武裝咁喺懸崖峭壁攀爬，睇見佢兩個喺半空時，其實都戥佢哋驚，不過劇情應該係講佢兩個都係攀石高手，所以好快就爬到上山頂啦！
趕頭趕命
見古仔同千嬅上到山頂後，兩個人都好似鬆咗一口氣，而且好享受咁望住個大海深呼吸，不過杜Sir因為要趕拍太陽景，所以都唔可以畀古仔同千嬅咁多時間欣賞現場嘅美景啦！嗱嗱聲又要趕住拍下一個鏡頭。
拍到大約下晝5點就收工啦！見古仔同千嬅落返山腳下，沿路行返去自己架保母車嘅時候，因為路程都有成15分鐘，見到千嬅行到有啲喘氣，反而古仔就冇乜嘢，之後仲遇到途人捉住佢哋要求合照同簽名，而佢哋都好友善咁答應要求。
撰文：馮仁昭
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24