波齡稍長嘅60、70後球迷，相信也對由意大利皮具贊助嘅「意大利球壇盛事」不感陌生；90年代初，收費電視未如現在般興盛，免費電視台幾乎每月一度嘅直播意甲賽事，都往往成為小弟廢寢忘餐必睇嘅節目。那些年嘅無記，製作遠不如現在飛虎隊識避子彈般馬虎，球壇盛事，不是米蘭市打吡，就是祖記對AC等大戰。受惠90世界盃餘溫，當時意甲確號稱小型世界盃，AC猛將如沙維斯域、波班、韋亞等頂級外援，還有馬甸尼、阿柏天尼等意大利當打國腳，祖記也有迪比亞路、施丹、拉雲拿利等，那些年意甲巨星猶如數之不盡。
時至今日，電視台已經猶如採用自助餐式方法嚟提供電視直播，量比質重要，一周10場英超，還各有數場西甲、德甲，連二線嘅荷甲、法甲都有得播，甚至連香港良心免費台都提供蘇超直播，好坦白講，一個普通香港球迷邊有可能睇得晒，但又點解意甲都未有着落？之前現在台都播過意甲，聽喺呢個台工作嘅行家所講，意甲直播收視真係好低，就算有國米、AC等孭飛戲碼，都遠低於英超中游球隊交鋒，而且意甲直播權分散，搞到佢哋意興闌珊，冇再續播。意甲早幾年又唔抵幫，假波醜聞加上星散，又確係幾趕客。
不過呢個世界冇絕對，其實香港意甲粉絲始終有基本數量，而且為咗亞洲市場，都開始同西甲一樣改革開波時間，好似周日早場、周一夜場等，但整體吸引力弱呢個問題，都仲未改善到。不過喜見意甲群雄並起，國米、羅馬、拿玻里，甚至費倫都有點看頭，今季睇唔到，希望遲啲總有機會吧！文：牽牛
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24