由張家輝主演的電影《激戰》，叫好叫座，更掀起一股學打拳熱潮。在《激戰》中扮演師奶學員的盧覓雪，曾搞笑地表示想被拳王張家輝鎖實，《蘋果動新聞》大前日就安排盧覓雪跟06年IFMA世界拳王冠軍杜恆霖（Bryan）學藝，並向曾學半桶水泰拳的趙勁皓（King）挑機。而動主播吉吉則扮《激戰》中的姜皓文，陪盧覓雪練拳。悟性甚高的盧覓雪活學活用，她學了三招鎖式，成功把大隻King扣在地上，令他動彈不得。
換上運動裝的盧覓雪到場，即聽從Bryan指示做熱身，Bryan先後教盧覓雪Armbar、Triangle Choke及Rear Naked Choke三招，她馬上跟赤膊的King上擂台比拼，成功把他箍到實。
學泰拳防狼
盧覓雪利用一雙肉腿交叉鎖實King的左手，肉腿又擱在他的雞扒胸上，大家都勸喻King不可立亂反抗，因為一旦用錯力便有斷手的危險。盧覓雪與King埋牙肉搏時，二人非常投入，懶理身體接觸，最終盧覓雪成功壓倒大隻King！
事後King大讚盧覓雪有實力，他前晚在電話中說：「我估唔到佢咁嘅身形，但動作好敏捷，學嘢又快上手，幾招就鎖到我唔郁得。」King都熱愛打泰拳，他說：「希望將來有機會，我都上次擂台打番場。」另一邊廂，經一輪全身運動，盧覓雪雖贏盡牙骹，但因運動量大，消耗體力，她都搞到周身痠痛，她前晚也說：「女仔學嚟防狼唔錯，但我咁嘅年紀都唔會遇到，但學兩招強身健體都好好。」
採訪、攝影：周吉佩
場地：Hayabusa
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24