木薯資源（841，市值3.3億銀）8月尾發盈喜，股價有反應，但相信只係熱身，有強烈理由睇木薯起碼翻一番。好！入戲肉。
木薯係全泰國最大乾木薯片出口商，及中國最大進口商。集團講明今年9月底半年度，純利會大升。木薯去年度同期，純利得708萬銀，基數低，所以，最新半年純利大升，唔奇。
業績靚仔靠實力
但不妨睇埋集團到今年3月底張成績單，全年度純利，搶到上3,060萬銀。若果唔計一項船隻減值2,480萬銀，實際純利更高達5,540萬銀。即係話，木薯喺上年下半年度，先踩油發力，下半年嘅純利貢獻，高達4,830萬銀。所以，有理由相信，木薯係承接業務強勢，而唔係基數問題。
木薯啱啱喺今年7月宣佈，購買負重量4.8萬噸木薯片運船。集團打算提升運載力，業務前景係點，已經聞到有味。又據泰國商務部估計，今年木薯出口總額，會達到900億銀泰銖（折合224億港銀），創歷史新高。業界預計，今年出口祖國木薯，會增加18%，到過百億港銀。
再講，阿爺行城鎮化及環保政策（木薯適用喺替代能源），對進口木薯依重，越嚟越大。集團繼續肥仔水。
木薯今年度實際純利，係咁意增長20%，到6,650萬銀，預期PE得4.8倍。
又木薯現價（0.82元）仲貼近歷史低位，參考主場泰國，當地好似卜蜂（泰：CPF），由08年金融海嘯到家陣，就大升咗7倍，木薯殘到爆！又木薯低殘價，街貨市值得1億銀，PB得0.58倍，有強者入市，呢個市值，唔係一回事。買木薯起碼博翻一番到1.62元，預期PE都係得8倍幾。
錢雋
細價股專家
本欄逢周二、五刊出
足本收睇《亂噏24》x 卓韻芝；緊接歡迎「宇宙最強」甄子丹！
周一至周五《亂噏24》預埋你： http://bit.ly/appletalk24