邊區最容易撞見明星出入？答案可能係觀塘，事關唔少藝人、導演貪觀塘工廈嘅租金或呎價相宜，一早喺呢區設工作室，著名經理人陳淑芬買入8層、攞埋命名權嘅觀塘「天星中心」噚日正式入伙，出名投資物業有道嘅漫畫家馬榮成都係呢度業主。
馬榮成切燒豬後快閃
馬榮成同陳淑芬噚日以業主身份，為天星中心切燒豬慶祝入伙，陳淑芬斥資2.4億元掃入8層，佔整幢工廈近三分之一業權，發展商於是畀埋命名權佢。
聽講佢想喺呢度建立娛樂王國基地，天星中心正正係佢間娛樂公司嘅寶號。
陳淑芬買入8層合共超過4萬方呎，𠵱家未決定點用，不過就擇咗下個月一個吉日開張，到時會搞場雞尾酒會，陳百祥、譚詠麟應承到賀。
至於馬榮成以7,300萬元買入嘅頂層複式單位就係自用，可惜大師事忙，切完燒豬就急急腳鬆人。
「起動九龍東」計劃令東九工廈升值潛力無限，而且目前平均呎租十幾蚊，一個5,000方呎工廈，唔使十萬銀，難怪吸引一眾娛樂名人進駐，有租有買，好似大導演劉偉強、黎明、陳慧琳、林海峰、詹瑞文等人嘅工作室都喺觀塘。
劉德華當年亦租用同區工廈做工作室，原本想買㗎喇，但業主唔賣，附近又冇啱嘅貨，最終搬咗去九龍灣。聽講當年《無間道》梁朝偉企喺天台用槍指住劉德華講：「對唔住，我係差人！」嘅經典一幕，咪就係喺觀塘鴻圖道某工廈天台拍㗎囉！
李華華
mailto:[email protected]
死過翻生的卓韻芝要同倪匡蔡瀾肥佬黎講人生大限？
毌需忌諱，《亂噏24》周一至周五預埋你： http://bit.ly/appletalk24